Kargador nakuhaan 1 ka bulto

CEBU, Philippines - Nasikop sa buybust operation sa mga ahente sa Philippine Drug Enforcement Agency (PDEA)-7 ang usa ka kargador sa Carbon public market nga nag-sideline pagka-drayber og traysikad tungod kay giingong usa ka level two drug pusher.

Gisikop kini sa miaging gabii sa barangay Ermita ning siyudad sa Sugbo.

Ang tigpamaba sa PDEA-7 nga si Jessie Tabanao mipresentar sa dinakpan nga giilang si Victor Macaraya.

Ang buybust operation gipangulohan ni Intelligence Officer 3 Mark Maramba uban sa mga kaubanan niini sa PDEA.

Matud ni Tabanao nga nakadawat sila og report pipila ka semana ang nakalabay kabahin sa ilegal nga kalihukan ni Macaraya, hinungdan nga ila kining gipaubos sa surveillance ug sa dihang positibo nga namaligya og drogas, ilang giplano ang buy-bust operation ug gihimo sa miaging alas 6:30 sa gabii.

Usa ka poseur buyer sa PDEA-7 mipalit og usa ka pakete sa shabu bali’g P200 gikan ni Macaraya ug sa dihang gitunol na ang shabu, ila dayon kining gisikop.

Dugang pa ni Tabanao nga sa dihang ilang gi-body search si Macaraya, nakuha ang usa ka bultong shabu sa bulsa. Ang usa ka bulto nagkantidad og P34 mil, matud ni Tabanao.

Si Macaraya nga gikuhaan og pamahayag hugtanong mihimakak nga iya kadtong shabu nga nakuha sa mga ahente sa PDEA-7 gikan kaniya.

“Dili na ako oy. Nagduwa ra man ko ato og billiard, kadtong babaye maoy ilang gipalitan pero ako man hinuoy girombo sa ilang asset. Kargador ra man ko sa Carbon. Pero gamay raman og kita nag-sideline na lang ko og drive og traysikad pero dili jud na ako ang shabu,” dugang pa ni Macaraya nga nagpanglingo-lingo sa iyang ulo.

Apan matud ni Tabanao nga si Macaraya makabaligya og sobra 200 gramos nga shabu matag semana diha lamang sa Ermita nga maoy iyang area.

Atol sa maong buybust operation gidakop usab sa taga PDEA-7 si Marlon Flores nga taga Cabantan, Mabolo sa dihang nagkupot kini og barbecue stick nga gipakita sa mga ahente apan sa dihang girikisa ang bulsa sa short pants nakuhaan hinuon siya og duha ka tinfoil.

Ang duha ka dinakpan kasamtangan karong gibalhog sa karsel sa PDEA-7 ug gikatakdang pasakaan og kaso. – BANAT NEWS