Faelnar aktibo Nangampanya para Banawa

CEBU, Philippines - Aktibong nangampanya si Kapitan Eugenio “Jingjing” Faelnar sa Guadalupe nga pabotaron ang mga konstituwente sa ipahigayon unyang plebisito sa ilang barangay alang na sa hingpit nga paghimo og usa ka barangay sa sitio Banawa ug Englis gikan sa barangay Guadalupe.

 Una nang gipahibalo ni Kongresista Antonio Cuenco nga ang plebisito gitakda sa Comelec karong umaabot nga Pebrero 28. Ang kongresista nga maoy nangamahan sa balaodnon pagbuak sa barangay Guadalupe, nangita pa hinuon og pundo nga gamiton sa referendum.

Apan masaligon si Cuenco nga mahinayon ang plebisito human usab pasaligi sa Malacañang nga hatagan og P1.5 milyones alang niini.

Nasayran nga ang mga opisyal sa barangay Guadalupe pinanguluhan ni Faelnar, dakong supak nga mabuak ang ilang barangay, apan taliwa niini gitataw hinuon ni Faelnar nga lahi ang iyang ikampanya ngadto sa ilang mga konstituwente atol sa referendum.

“Ang ako lang ikampanya sa referendum mao nga go out and vote kay kung manggawas lang na sila, dili man gyud makadaog ang “yes vote” sumala ni Faelnar.

Pabiling nagtuo ang barangay kapitan nga ang pabor sa pagbuak sa Guadalupe mao lang ang ilang kaatbang sa pulitika nga kanunay’ng mapildi sa eleksyon.

Una nang gipadayag ni Cuenco nga mahimong walay bili ang iyang gipalabang nga proposal kung kini dili uyunan sa kinabag-ang mga molupyo sa Guadalupe.

Masaligon hinuon ang kongresista nga modaug ang yes vote atol sa plebisito tungod kay ang mga molupyo mismo sa barangay giingong maoy nangayo niini.

Partikular na niini ang mga molupyo sa duha ka sitio nga naghugpong alang sa pagpangayo og kagawasan gikan sa barangay Guadalupe. - Elly Bolonos (BANAT NEWS)