Krista, Derek, Sam maoy modala sa 'Kadaugan'

CEBU, Philippines - Ang Lapulapu City Tourism Council nagplano nga mokuha nilang Derek Ramsay, Krista Ranillo ug Sam Milby alang sa Kadaugan sa Mactan ning tuiga. Matud ni Sunshine Alegre, kalihim sa Tourism Council sa dakbayan sa Lapulapu nga atol sa panagtigum sa mga sakop sa Tourism Commissioners sa milabay’ng semana nasabutan nga ang tulo ka artista maoy padad-on sa mga papel nila ni Lapulapu, Magellan ug Reyna Bulakna.

Si Alegre miingon nga ang Philippine Gaming Corporation (PAGCOR) Mactan maoy gitahasan sa mga commissioner pagkumbinser sa mga artista nga maoy maglangkob sa maong kalihukan.

Ang Pagcor maoy mohatag og talent fee sa mga artista nga mosalmot sa Kadaugan sa Mactan samtang ang Tourism Commission maoy mohatag sa ilang accommodation ug pagkaon atol sa maong kalihukan.

Gituyo sa mga commissioner ang sayo nga pagpangandam sa mga moapil nga artista sa kalihukan gumikan sa kadaghan sa mga schedule sa mga artista hinungdan nga dili dayon makasanong.

Kahinumduman nga sa milabay’ng tuig, si Joko Diaz ang midala sa papel ni Lapulapu, si Gino Padilla kang Magellan ug Maureen Larazabal kang Reyna Bulakna. Samtang sa 2008, si Manny Pacquiao maoy midala sa papel ni Lapulapu, Dennis Trillo kang Magellan ug Jinky Pacquiao kang Reyna Bulakna. – BANAT NEWS