Cuenco mibalibad na's appoinment

CEBU, Philippines - Pormal nang gibalibaran ni Kongresista Antonio Cuenco ang iyang appointment pagka-ambassador sa Pilipinas ngadto sa Italy.

Ang kongresista mipadala na og suwat ngadto kang Presidente Gloria Macapagal Arroyo sa intensyong pagbalibad sa nahisgutang katungdanan.

Gipasalamatan ni Cuenco ang presidente sa pagtudlo kaniya isip ambassador ngadto sa Italy ingon man sa maayong kabubut-on nga gipakita niini.

“Ako siyang gibalibaran ug gipasalamatan pud sa iyang maayong kabubut-on ngari nako, tim-os kong nagpasalamat niya,” sumala ni Cuenco.

Giangkon sa kongresista nga dako ang iyang kasagmuyo sa dihang gibabagan sa Commission on Appointments (CA) ang iyang ambassadorship.

Apan gipadayag ni Cuenco nga dako usab ang iyang kalipay human itudlo isip secretary general sa ASEAN Inter-Parliamentary Assembly (AIPA).

Si House Speaker Prospero Nograles giingong maoy mirekomendar kang Cuenco sa maong posisyon nga dili na manginahanglan og pag-uyon sa CA. Ang AIPA gilangkuban og mga parliamentarian o kongresista gikan sa napulo ka nasud nga sakop sa Association of Southeast Asian Nation.

Kini naglangkob sa Cambodia, Indonesia, Laos, Malaysia, Philippines, Singapore, Thailand, Vietnam, Brunei Darussalam ug Myanmar.

Mosugod unya si Cuenco sa iyang bag-ong katungdanan human sa eleksyon ug adto na magbase sa Jakarta, Indonesia diin nahimutang ang headquarters sa AIPA.

Nag-una unyang gimbuhaton sa kongresista mao ang pag-coordinate sa mga parliamentarian sa ubang kanasuran nga sakop sa maong kahugpungan.

Duna hinuoy plano si Cuenco pagkumbinser sa mga sakop sa AIPA nga ibalhin ang ilang headquarters diha sa South Road Properties (SRP).

Matud sa kongresista nga nagkahinabi na sila ni Mayor Tomas Osmeña labot niini ug misugot ang nauwahi sa iyang plano. Nagkanayon si Cuenco nga mabulahan unya ang dakbayan ug ang kasikbit nga mga dapit sa Sugbo kun iyang makumbinser ang mga sakop sa AIPA. (BANATNEWS)