CEBU, Philippines - Gihugopan sa liboan ka mga debotos ni Sr. Sto. Niño ang gihimong tinuig nga “Traslacion” kagahapon sa imahen niini uban sa imahen sa Birhen sa Guadalupe gikan sa Basilica del Sto. Niño paingon sa National Shrine of St. Joseph sa Mandaue.
Si Msgr. Cristobal Garcia ug Bise Mayor Michael Rama maoy nangulo sa motorkada gikan sa Basilica paingon sa Mandaue.
Sa mga karsada nga giagian sa motorkada, ilabi na gikan sa M.J. Cuenco Avenue, gihugopan sa mga debotos sa Balaang Bata.
Ang mga debotos sa Mandaue nag-atang sa imahen ni Sr. Sto. Niño ug Birhen sa Guadalupe sa utlanan sa Subangdaku ug barangay Mabolo.
Ang dalan gikan sa barangay Subangdaku paingon sa dalan A. del Rosario sa barangay Tipolo ug barangay Guizo napuno sa mga dayan-dayan uban sa mga altar sa daplin sa kadalanan diin gipahimutang ang mga imahen ni Sr. Sto. Niño.
Si Msgr. Hedelito Abella, kura paroko sa St. Joseph sa barangay Centro nangulo sa kaparian ug mga debotos sa Mandaue nga misugat sa imahen.
Sila si Gobernador Gwendolyn Garcia, Kongresista Nerissa Soon-Ruiz, Mayor Jonas Cortes ug Bise Mayor Carlo Fortuna ug mga konsehal sa dakbayan sa Mandaue miapil sa pagsugat sa Balaang Bata ug Birhen sa Guadalupe.
Ang milagrosong imahen ni Sr. Sto. Niño ug sa Birhen sa Guadalupe magpabilin sulod sa Shrine sa Mandaue ug bilaran sa mga debotos sulod sa tibuok gabii ug dad-on sa Ouano Wharf sa dakbayan sa Lapulapu aron isakay og galleon alang sa Fluvial Procession sa kadagatan sa Mactan Channel sa alas 6 sa buntag ug ikanaog sa Pier 1 ug sugaton sa prayleng Agustino uban sa mga sakop sa 1st Ready Reserve Battalion sa Philippine Army pinanguluhan ni Maj. Soliver Peras ug Lt. Col. Nestor Porlucas sa 701st Community Defense Center sa Army Reserve Command.
Gikan sa Pier 1, dad-on ang imahen balik sa Basilica aron hinumdoman ang unang pagpamunyag sa Sugbo kang Hara Juana ug Rajah Humabon pinaagi ni Msgr. Garcia sa Pilgrim Center sa alas 9 sa buntag.
Sa alas 2 sa hapon, himuon ang taas nga prosesyon sa imahen ni Sr. Sto. Niño. – BANAT NEWS