Tagna ni Eloy gisupak ni Tomas, Alvin

CEBU, Philippines - Gisalikway sa duha ka political leaders sa dakbayan sa Sugbu ang mga panagna sa usa sa iladong card reader sa siyudad nga si Cirilo Arepal nga naila usab nga Brother Eloy kabahin sa umaabot nga resulta sa piniliay dinhi.

Sila si Mayor Tomas Osmeña sa partidong Bando Osmeña Pundok Kauswagan (BOPK) ug kanhi mayor Alvin Garcia sa Kugi Uswag Sugbu (Kusug) misalikway sa panagna ni Arepal.

Si Brother Eloy gikatahong nakapanglantaw nga sa makausa pa, maangkon sa BOPK ang tanang elective posts sa siyudad sa umaabot nga eleksyon.

Apan matud ni Osmeña nga ang resulta sa eleksyon wala sa mga kamot sa card reader kun dili anaa sa mga kamot sa katawhan.

“Dili ko motuo ana kay lain ang akong Ginoo, the election result wala sa card reader naa sa kamot sa mga tawo mismo,” sumala ni Osmeña.

Matod sa mayor nga ang ilang grupo maninguha ug maningkamot sa pagpangampanya aron modaug sa umaabot nga eleksyon.

Gani gibutyag ni Osmeña nga ipadayon karong gabii ang ilang gihunong nga pulong-pulong sa matag sitio sa kabarangayan sa dakbayan.

Kung dili motuo si Osmeña sa panagna sa nahisgutang card reader, mas labaw nang dili motuo ang naagrabyado sa panagna niini nga si Garcia.

Gani giakusahan pa sa kanhi mayor si Brother Eloy nga tawo ni Osmeña tungod sa giingong dili makiangayon nga panagna niini sa umaabot nga piniliay.

Nagtuo si Garcia nga gikundisyon lang ni Arepal ang hunahuna sa mga Sugbuanon ug karon pa lang kini iya nang gisalikway.

“Dili ko motuo ana, it’s not even worthy for my reaction, ayaw na tagai og importansya kay tawo man nang Tomas,” matud ni Garcia.

Parehas hinuong gipanghimakak ni Osmeña ug Garcia nga sila personal nga nakaila ni Brother Eloy nga giingong molupyo sa barangay Guadalupe.

Apan samtang mobalik na pagpahigayon og pulong-pulong karong gabii ang kampo sa BOPK, gibutyag ni Garcia nga ang Kusug padayon pa nga niplantsa sa ilang estratehiya alang sa epektibong pagpangampanya.  – BANAT NEWS