CEBU, Philippines - Patay ang usa ka 21-anyos nga lalaki human gidunggab sa ilang silingan gamit ang plamingko niadtong Martes sa gabii diha sa sitio Dakit, barangay Poblacion, lungsod sa Pinamungahan.
Ang biktima giila sa mga polis nga si Ramonito Reyes, residente sa nahisgutang lugar nakaangkon og usa ka samad dinunggaban sa walang bahin sa dughan ug patay nang naabot sa Pinamungahan District Hospital.
Ang suspetsado mao si Sacarias Abellana, 57, silingan sa biktima ang nagtingkagol karon sa Pinamungahan detention cell.
Si PO2 Dominic Pantajo, duty desk officer mibutyag kagahapon sa Banat News nga si Felicidad, inahan sa biktima nagkalalis ni Abellana kabahin sa ilang mga hayopan.
Sa maong panaglalis gibato ni Abellana si Felicidad ug naigo sa nawong hinungdan nga miduol ang biktima apan kalit kining gihansakan sa suspek sa gidalang plamingko. - Brenda Batuto ug Raymond Abarcas (BANAT NEWS)