CEBU, Philippines - Namatay ang usa ka amahan samtang kritikal ang iyang duha pa ka tuig niyang anak dihang gidasmagan sila sa usa ka V-Hire nga sakyanan didto sa national highway sa barangay Baliwagan lungsod sa Balamban niadtong Domingo sa gabii.
Si SPO3 Arve Banate sa Balamban Police Station nga gikahinabi sa Banat News mi-ila sa namatay nga si Joseph Garcia, 27, nga taga Baliwagan, samtang ang dos anyos niyang anak nga lalaki anaa sa talandugong kahimtang sulod sa Vicente Sotto Memorial Medical Center (VSMMC).
Matud pa ni SPO3 Banate nga naglakaw ang biktima nga nagkugos sa iyang anak uban sa iyang asawa apan gikatahong pag-agi sa V-Hire nga nagdala sa plaka GWV-794 gimaneho ni Aurelio Bacus, 31, nga taga Sitio Cantipla barangay Tabunan, natapsingan ang biktima nga nagkugos sa iyang anak.
Ang pagkabunal sa ulo sa biktima sa sementadong karsada maoy hinungdan sa hinanaling kamatayon niini.
Nasayran usab sa kapulisan nga naka-inom og ilimnong makahubog ug samtang naglakaw kini sa karsada naglalis kuno ug ang iyang asawa hinungdan nga wala makabantay sa sakyanan.
Hinuon si Bacus nga maoy suspetsado mitahan sa iyang kaugalingon ngadto sa mga sakop sa City Traffic Operation Management (CITOM) alas 11:20 sa gabii niadtong Domingo ug kagahapon sa alas 2:00 sa hapon gibalhog siya sa prisohan sa Balamban. (BANATNEWS)