125 gi-hostage sa mga armado

CEBU, Philippines - Mga armadong tawo mi-hostage sa 125 ka tawo nga gilangkoban sa magtutudlo ug mga estudyante sa Maitum Elementary School sa sitio Maitum barangay San Martin sa lungsod sa Prosperidad sa Agusan del Sur kagahapon sa buntag.

Sa report sa ABS-CBN NEWS ug sa GMA News. tv ang mga hostage takers sumala pang Chief Supt. Lino de Guzman Calingasan, ang Caraga regional police director, gilangkuban sa 15 ka armadong tawo nga miyembro sa Ondo Perez Criminal Group.

Sa report sa ABS-CBN News kagahapon gikatahong padulong untang maghatud og warrant of arrest batok kang Ondo Perez nga suspek sa mga pagpatay diha sa maong lugar, apan nakamatikod ang grupo ug mirakrak sa kapolisan ug midagan ngadto sa maong tunghaan ug gi-hostage ang mga tinun-an og maestro.

Matud pang Calingasan nga ang mga hostage takers mga kanhi miyembro sa Citizen Armed Force Geographical Unit (CAFGU) ug armado og mga tag-as nga kalibre sa armas.

Niadtong milabay'ng bulan sa Pebrero gikatahong nagkaengkwentro ang grupo ni Jun Tubay ug grupo ni Perez nga miresulta sa kamatayon sa mga kabanay ni Tubay.

Sumala pa sa report nga buot sa mga hostage takers nga ibasura ang kasong murder batok sa ilang lider nga si Perez, arestuhon si Tubay, kinahanglang may sakop sa media ug ang paghunong sa paggukod kanila.

Pagkahapon, dunay 18 ka mga bihag ang gibuhian, 17 niini pulos mga bata. Sa sayo pa kagahapon, 50 na ka hostage ang nakaikyas lakip na ang duha ka maestro ug maoy mitug-an sa kapolisan sa nahitabo.

Duna nay gipadalang mga sakop sa Agusan Del Sur PNP ug Special Action Force aron moabag sa pagpalingkawas sa mga biktima, samtang gipahibalo niining padayon hinuon sa pakig-estorya ang mga suspek ngadto sa mga awtoridad.

Hinuon giklaro ni Calingasan nga walay kalabotan sa umaabot nga eleksyon ang maong insidente sanglit criminal gang ang grupong Ondo Perez group.

Samtang gikatahong girakrakan sa grupo ang mirespondeng mga polis diha sa kasikbit nga barangay sa La Purisima maong nagdinaganay kini hangtud nga naabot sa maong tunghaan. - Gikan sa Wires (BANAT NEWS)