Desisyon sa Petisyon vs. G. Wagas ipagawas sunod semana

CEBU, Philippines - Ipagawas na sa korte karong sunod semana ang desisyon sa kasong disqualification case nga gisang-at batok ni congressional candidate Gilbert Wagas sa municipal trial court MTC Liloan.

Mao kini gibutyag ni Liloan MTC Judge Jasper Jessie Dacanay dihang nahinabi sa Banat News human usab sa gipahigayong hearing kagahapon sa alas 10:00 sa buntag kabahin sa gidusong petisyon. Gibutyag ni Dacanay nga atol sa maong hearing ang petitioner nga si Compostela Vice Mayor Joel Quinio nga gi-representahan sa iyang abogado nga si Atty. Francis Michael Abad miduso sa ilang mga ebidensiya pagkombinsir sa korte nga angayang i-disqualify ang kandidatura ni Wagas.

Matud pa ni Dacanay nga lakip sa gidusong mga ebidensya mao ang kopya sa desisyon sa Sandigan Bayan nga nagkombikto ni Wagas sa kasong malversation of public funds sa dihang nagsilbi pa kining officer-in-charge pagka-mayor sa Compostela.

Si Wagas giaresto sa mga sakop sa National Bureau of Investigation niadtong milabay’ng bulan ug gibalhog na sa Muntinlupa human malutsi og bench warrant kalabot sa maong desisyon sa Sandigan Bayan.

Gi-insister ni Atty. Abad nga angay kanselahon ang kandidatura ni Wagas tungod kay final and executory na ang desisyon sa graft court.

Samtang ang kampo ni Wagas girepresentahan sa iyang abogado nga si Atty. Ernesto Rama atol sa maong hearing, ang mga Wagas una nang nagdudang may bulok politika ang pag-aresto kang Gilbert sanglit ‘recycled’ na ang maong bench warrant.

Matud pa ni Dacanay nga natapos ang maong presentasyon sa mga ebidensya sulod lang sa halos duha ka oras ug paaboton nalang sa sunod semana ang iyang ipagawas nga resolusyon sa maong petisyon. Si Wagas maoy miatbang ni incumbent congressman Red Durano samtang ang iyang igsuon nga si Mayor Ritchie Wagas atbangan usab ni incumbent Quinio nga maoy kandidatu sa Bakud Party ubos ni kongresista Durano. - Darrel Carumba (BANAT NEWS)