Tulo ka tawo naghikog

CEBU, Philippines - Tulo ka tawo ang gikatahong naghikog sa managlahing dapit sa Sugbu, usa kanila drayber nga giingong nalisoan sa pangisip gumikan sa paggamit og ilegal nga drugas.

Ang drayber nga naghikog mao si Kevin dela Torre Orinday, 28, residente sa sitio Kalubihan , Basak dakbayan sa Lapulapu sa milabay'ng hapon nga napalgan sa iyang inahang si Rosalina nga nagbitay sa ilang kusina gamit ang usa ka nylon nga pisi nga gihikot sa liog ug ang tumoy ngadto sa kisame.

 Atol sa imbestigasyon ni SPO1 Honorato Inihao sa Crime Against Persons ang inahan niini mipadayag nga dugay nang nalulong sa ginadiling drugas ang iyang anak ug maoy gituohan niining nakaingon sa pagkaliso sa pangisip niini.

Samtang sa sitio Tabunok, Maslog dakbayan sa Danao usa ka bana nga giaway sa iyang asawa naghikog usab gamit ang usa ka pisi nga gihikot sa iyang liog ngadto na sa punoan sa Calachuchi.

 Ang nagpakamatay mao si Ramon Capili Quiros, 33, manghimoay og hollow blocks nga matud pang SPO1 Allan Muñoz base sa pamahayag sa igsuon sa biktima nga si Carmelita Quiros sa sayo nianang adlawa nag-away ang iyang igsuon ug asawa niini.

 Tungod sa pagguba niini sa bungbong sa ilang balay gisumbong kini sa iyang asawa ngadto sa barangay apan wala kini motunga sa barangay alang sa husay ug milakaw dala ang pisi ug pinote.

 Napalgan nalang nila kining nagbitay na sa punoan ug wala nay kinabuhi.

Samtang patay nang naabtan sa mga kabanay ang usa ka Ellaine Sanchez,17, sa miaging hapon sa sitio Lower Puti barangay Buhisan ning dakbayan.

Ang kapuyo niining si Jeffrey Garcia mibutyag nga napalgan nga nagbitay na sulod sa ilang panimalay ginamit ang pisi, gikatahong nasagmuyo kini sa tabi-tabi sa mga silingan nga namasangil kaniyang mangigi kon mohatag og pangunsumo si Garcia sa inahan niini.

Gisuwayan pa nila og tabang ug mitawag sa Emergency Rescue Unit Foundation (ERUF) apan patay na kini.  - Uban sa report nila ni Darrel Carumba ug Lesley Caminade (BANAT NEWS)