Tungod sa selos lalaki giluba namatay

CEBU, Philippines - Gidunggab patay sa usa ka batan-ong lalaki ang iyang kaubang trabahante tungod sa selos sa gugma samtang nahinanok sa pagkatulog sa ilang gitrabahoan sa barangay Lamacan lungsod sa Argao niadtong milabay’ng alas 12:00 sa tungang gabii.

Ang biktima nga patay nang nadangat sa tambalanan mao si Jason Alviola, 20, taga sitio Canbantog barangay Lamacan sa maong lugar, samtang ang suspek mao si Jessie Eltagunde, 21, tagasitio Bacong barangay Binlod.

Matud pa ni SPO1 Jayme Mendoza sa Argao Police dihang nahinabi sa Banat News ang suspek daan nang nagselos sa biktima dihang nakigsuod kini sa iyang uyab nga kauban ra nila sa trabaho.

Gikatahong tungod niini nag-away ang suspek ug uyab ug nananghid sa agalon nga mohunong na sa pagtrabaho, nianang pagkagabii nakit-an kining mibalik sa pagtuong dunay nahabilin nga butang.

Apan mao nalay ilang kakugang nga gitusak-tusak na diay niini og dunggab ang biktima diha sa higdaanan ug patay nang nadangat sa tambalanan, ang suspek mitahan pagkasunod buntag ngadto sa kapolisan. - Darrel Carumba (BANAT NEWS)