Nagmotor girapido usa patay, usa angol

CEBU, Philippines - Nabuslot ang ulo sa usa ka lalaki samtang kritikal ang kahimtang sa higala niini human gibulit og bala sa usa ka tawong nagsakay og motor pasado alas 10 sa miaging gabii sa sitio Maaslom barangay Busay.

Si Gilbert “Gigi” Bonghanoy Tudtud Jr., usa ka habal-habal driver sa nahisgutang lugar namatay diha-diha dayun tungod sa samad pinusilan sa ulo samtang ang higala niining si Rodner “Oni” Erjer Limas, taga Veterans Drive sa barangay Lahug talandugon ang kahimtang tungod sa daghang igo sa bala sa lawas.

Nasayran nga ang duha ka biktima padulong sa sitio Lower barangay Busay luwan sa motor nga gimaneho ni Tudtud apan sa dihang nakaagi sila sa Busay Police Outpost sa barangay Busay si Tudtud hapit nakasaghid og laing motor nga dunay lalaking sakay. Ang managhigala mibaliwala lang niini ug mipadayon sa ilang pagpadagan apan pag-abot nila sa Plazaville sa barangay Apas adunay mikalit og butho nga usa ka motor nga may duha ka lalaking sakay ug walay daghang pasumangil mipaulan kanila og bala.

Misarasay ang motor sa duha ka biktima hangtud nga natumba hinungdan sa hinanaling kamatayon ni Tudtud, si Limas bisan paman og nabulit og samad pinusilan daling nakapangayo og pakitabang sa usa ka gwardiya nga si Ace Quinañola sa Maria Luisa Village gibana-banang 100 metros gikan sa ilang gihagbaan.

Nakuha sa crime scene mao ang pito ka kabhang sa kalibre .9mm ug usa ka metallic fragment ug pitaka ni Tudtud nga adunay sulod nga kwarta ug mga ID.  - BANAT NEWS