CEBU, Philippines - Gilapsan sa bala ang abaga sa usa ka 27 anyos nga ginang human kini mapusili sa iyang igsoong lalaki didto sa Sitio Buswang ,barangay Cambang-og ,siyudad sa Toledo niadtong Huwebes sa alas 3:55 sa hapon.
Ang biktima mao si Rebbeca Sadio Solteral, 27, minyo, samtang ang suspek mao ra usab ang iyang maguwang nga si Eleno Sadio, 35, nga pulos nagpuyo sa nahisgutang lugar.
Si PO3 Jemelon Cotmaya sa Toledo City Police Station mibutyag sa Banat News nga ang biktima ug suspek nagkalalis bahin sa personal nga problema sa ilang pamilya nga nisangko sa kainit.
Gumikan kay migilok ang kamot sa suspetsado, gilanit niini ang iyang armas de fuego nga gitangkil sa hawak ug gipabuto unya didto molusot ang bala niini sa iyang walang bukton ug milahos sa abaga ug bukobuko sa iyang manghod.
Ang biktima daling gidala sa Toledo City District Hospital (TCDH) apan gibalhin kini sa dakbayan sa Sugbo samtang ang suspek misibat usab dayon human sa hitabo apan sa pagka alas 5:00 pasado sa hapon gihatod kini ngadto sa TCDH gumikan sa samad sa iyang bukton. Hinuon ang pamilya sa biktima dili na mopasaka og kaso sa suspek nga iyaha ra mga anak ang nakapusil ug napusilan. (BANATNEWS)