Gikulata sa bana kay utan ang sud-an

CEBU, Philippines - Nakaangkon og grabeng mga bun-og sa nagkadaiyang parte sa kalawasan ang usa ka ginang human kulataha sa iyang kapuyo tungod sa kasuko nga utan lang ang ilang sud-an sa panihapon.

Ang biktimang midangop sa kapulisan naila nga si Mary Joy Mahusay 22, nagpuyo sa nahisgutang lugar, gibalhog sa karsel sa kapulisan ang kapuyo nga si Arman Tuling 24, ang duha nagpuyo sa barangay Mabunao, sa lungsod sa Tabuelan.

Si Insp. Rolando Fajardo, hepe sa kapulisan sa Tabuelan nga gikahinabi sa Banat News nagkanayon nga gihikay na nila ang kasong Anti-Violence Against Women and Children’s Code ubos sa R.A 9262.

Apan nasagmuyo ang kapulisan human usab kagahapong adlawa ilang nahibaw-an nga dili na interesadong mosang-at og kaso ang biktima batok sa iyang kapuyo.

Matud pa ni Insp. Fajardo nga ang biktima nibutyag kanila nga makadaghan nang higayon nga nadala sa barangay ang duha tungod gihapon sa pasangil nga pagmaltrato sa lalaki sa babaye panahon nga mag-away.

Gani niadtong milabay’ng gabii wala na gyud siya makaagwanta human gilabay na usab siya’g bato niini dihang wala makaauyon sa gilutong sud-an nga ‘utan bisaya.’

“Ingon ang biktima nga gikan nagduwag basketball ang iyang kapuyo, pag-abot sa ilang balay gisukaran og panihapon pero nasuko man hinuon kay wala daw maka-uyon sa timpla sa utan bisaya,” sumala pa ni Insp. Fajardo.

Ang lalaki giingong mipunit og bato ug gilabay ang biktima nga nasamad na hinuon sa walang tuhod. - Guam Logroño (BANAT NEWS)