Taga Naga nag-rally pabor KEPCO

CEBU, Philippines - Gitinuod sa mga residente sa Naga ang bahad nga molusad og rally aron sawayon ang mga environmentalists nga supak sa katukoran sa duha ka plantang mogamit og coal uban sa pagpadayag pagsuporta hinuon sa katukoran pinaagi sa pag-awhag sa konseho nga hingusgan gyud nga mapadayon ang proyekto.

Kagahapon, gatusan sa mga residente ang nagpanon ug nagbitbit og mga placards nga nagsaway sa mga environmentalists ug nagpadayag sa ilang suporta sa Kepco plants nga mohatag og 200-megawatt nga suplay sa kuryente, diha sa atubangan sa bag-ong balay lungsod.

Ang mga residente giatubang ni Naga Mayor Valdemar Chiong inubanan sa mga konsehal sa lungsod aron mopadayag sa ilang pagdawat sa suporta sa mga taga Naga.

Sumala pang Chiong sa pakighinabi sa mga tigbalita nga dakong oportunidad alang sa mga taga Naga ang katukoran sa maong planta kay gawas sa hustong suplay sa kuryente makahatag usab kini og dugang trabaho ug kalamboan sa ilang lugar. Ang rally gitumong sa mga residente aron sawayon ang mga environmentalists nga maoy kusganong nangampanya aron babagan ang katukoran sa duha ka planta sa Korea Electric Power Corporation-SPC Power Corporation pinaagi sa pagpahibalong peligroso sa panglawas sa tawo ang aso ug coal ash gikan sa maong mga planta.

Lakip sa migawas nga mga report nga makasakit ang coal ash ug aso sama sa hubak, sakit sa panit, kanser ug uban pa hinungdan nga milusad og kaugalingong laboratory tests ang apektadong mga sector.

Apan ang residenteng nanguyog sa rally nagdala pa og mga placards nga nag-ingong “Wala mi hubaka,” “Suporta mi sa Planta,” “Pahawaon ang mga Anti-Naga” ug uban pa.

Sa milabay'ng semana migawas sa laboratory test sa duha ka samples sa coal ash gikan sa duha ka site sa Naga nga di delikado ang level sa mga gipanghinganlang kemikal sa mga environmentalists nga makadaot sa tawo.

Niadtong milabay'ng semana, gibuksan sa kadagkoan sa Kepco ang ilang bag-ong administrative building nga timaan nga sugdan na ang paghimo sa 200-megawatt coal-fired power plant sa Naga ug gipaabot nga mo-operate sa tuig 2011. 

 Usa sa mga environmental groups nga mibabag sa maong proyekto mao ang Korean Federation for Environmental Movement (KFEM) nga mibutyag nga ang Kepco maoy usa sa mga nag-unang violators sa environmental laws sa South Korea.

Ang grupo mipasangil nga ang maong kumpanya maoy nakaingon sa pagkaupaw sa kalasangan sa maong nasud ug nakaguba sa kinaiyahan ug nagbunga og mga sakit sa baga tungod sa abo sa ilang mga planta. Apan ang mga opisyales sa Kepco hugtanong mihimakak niini ug miingon nga walay basehanan ug walay ebidensya ang pangangkon sa environmental groups.

Samtang si Chiong nagkanayon nga wala sad siya’y nadawat nga report o reklamo kabahin sa mga nangasakit gikan sa mga residente, apan ang labing siguro nga dunay 1,500 nga mga taga Naga ang nakatrabaho karon diha sa Kepco.

Gumikan sa gipakitang suporta sa mga residente sa maong mga planta, mipagawas og resolusyon ang konseho sa Naga lakip na ang 28 ka barangay kapitan nga nagpadayag og suporta sa 200-mega-watt coal-powered nga planta.

Ang Kepco mipasalig nga moderno ang ilang gigamit nga teknolohiya sa coal-powered plants pinaagi sa ‘circulating fluidized bed’ nga mosigurong limpyo ang ibuga niining aso nga menos ang nitrogen oxide ug sulfur oxide sama sa gihimo sa Salcon Power Corp.    

Gisaway ni Atty. Benjamin Cabrido, ang environmentalist nga kusganong nisaway sa proyekto sa KEPCO ang gihimong rally sa mga molupyo sa Naga.

Matud pa ni Cabrido nga ang mga opisyales sa Naga mipahimulos sa kakulang sa impormasyon sa mga tawo ug gigamit pa hinuon kini aron suportahan ang ilang tinguha.

Kini bisan pa man og napamatud-an sa mga pagtuon nga makadaut sa kalikupan ang planta sa coal power sa Kepco.

Si Cabrido nagkanayon nga ang mga opisyales sa Naga nakalapas sa tawhanong katungod nga mapahibawo ang saktong impormasyon ug katungod nga makahanggap og limpyong hangin ang mga residente. (Ug report nila ni Gary Lao, Michelle Palaubsanon ug Chester Abadilla)   (BANATNEWS)