Moli-moli ug video karera sakmit

CEBU, Philippines - Naka-iskor na usab ang mga sakop sa Investigation and Detection Management Branch (IDMB) sa Cebu City Police Office human molampos pagsakmit sa duha ka moli-moli ug usa ka video karera atol sa ilang pagpangronda  didto sa Sitio Micabaja barangay Duljo-Fatima, niadtong Lunes sa gabii.

Si Supt. Paul Labra II, hepe sa IDMB daling nimando sa iyang mga sakop nga sila si SPO1 Filomeno Mendaros, PO3 Jonas Tahangit, PO2 Philip Plasus, PO1 Esmeraldo Quillosa ug PO1 Michael Maucesa sa pagsulod sa maong lugar human madawat nila ang impormasyon gikan sa usa ka concerned citizen.

Naabtan sa grupo nilang SPO1 Mendaros ang duha ka tawo nga nagduwa og moli-moli ug karera hinungdan nga ilang gipanakop.

Sila mao si Rolando Chua ,47, ug Lucila Villarojo, 32, nga taga Alumnus, barangay Basak-San Nicolas, ug gipasakaan dayon og kaso kagahapon sa korte gumikan sa kalapasan sa PD.1602.

Gisakmit usab sa kapolisan ang duha ka moli-moli, usa niini maayo pa samtang ang usa   nadaot na, Pl,483 cash, mga monitor, woofer, ug sudlanan sa sinsiyo.

Si Chief Insp. George Ylanan, hepe sa Investigative Section sa IDMB nga nahinabi sa mga tigbalita nagkanayon nga miminus na gayud ang problema sa moli-moli ingon man video karera dinhi sa dakbayan gumikan sa abag sa mga concerned citizen nga mohatag og impormasyon.

Matud pa niya nga sagad sa mga operators sa moli-moli ug video karera misagop na sa guerillia tactics pinaagi sa pagbalhin-balhin og lugar nga kabutangan sa ilang mga illegal nga sugalan apan kanunay kining gipanup-an sa mga otoridad. (BANATNEWS)