CEBU, Philippines - Upat ang naangol usa kanila Taiwanese human misampak sa punoan sa kahoy ang ilang sakyanan sa crossing nga bahin sa barangay Kabak lungsod sa Bantayan isla sa Bantayan niadtong Miyerkules sa alas 12:07 sa sayong kaadlawon.
Ang langyaw nga naangol mao ang drayber sa maong pribadong sakyanan nga si Yuan-Feng Wang, 37, kasamtangang nagpuyo sa barangay Maalat lungsod sa Madridejos.
Samtang naangol sab nga iyang mga sakay mao sila si Marlinito Medallo, 24,taga Tarong, Madredijos, Francisco Paragsa, 31 , taga Pili, Madredijos ug Leonardo Sena, 33, taga Tarong, Madredijos.
Matud ni PO2 Reno Pacenio sa Bantayan Police, gikan sa lungsod ang grupo ug pag-abot sa maong lugar nawad-an og preno ang sakyanan ug didto mopaingon sa daplin dayong sampak sa punoan sa kahoy.
Si Yuan maoy nakaangkon og seryosong kadaut sa kalawasan samtang mga ginagmay’ng pangos og bun-og lang ang naangkon sa mga sakay niini ug daling gidala sa Bantayan District hospital ug luwas na sa piligro sa paghimo ning balita. - Darrel Carumba (BANAT NEWS)