Gipatay atubangan sa anak

CEBU, Philippines – Gitabangan og pusil hangtud nga namatay atubangan sa iyang kaluhang mga anak nga lalaki ang usa ka 35-anyos nga lalaki atubangan sa eskuwelahan sa iyang mga anak diha sa Colawin National High School sa barangay Colawin sa bukirang bahin sa lungsod sa Argao kagahapon sa alas 6:30 sa buntag.

Ang biktima nabulit og samad pinusilan sa ulo ug kalawasan giilang si Jasper Ephan, 35, molupyo sa barangay Obaob sa maong lungsod samtang duha ka wala mailhing mga lalaki ang gitumbok nga mipatay sa biktima.

Matud ni SPO1 Ramuel Banugon sa Argao Police dihang nahinabi sa Banat News, ang biktima sakay sa iyang motorsiklo kauban ang iyang kaluhang anak nga nagtungha sa maong eskuylahan.

Pag-abot niini sa gawas nga bahin tungod sa gate sa maong tunghaan gipakanaug sa biktima ang mga anak ug igo lang gyud nga nakanaog sa motor ang mga bata giduol dayon sa duha ka mga lalaki ang biktima ug walay daghang pasumangil gitabangan nila og pusil ang biktima gikan sa luyo.

Subay sa pamahayag sa mga saksi ug sa mga bata, human sa pagkahagba sa biktima gikan sa motorsiklo gitiwasan pa kini og pusil una pa gibiyaan dihang nasiguro na nilang patay na kini.

Matud pa sa mga nakasaksi ang duha ka mamumuno paspas nga nanglakaw palayo ug pag-abot sa unahan nga bahin misakay og motorsiklo dayon miikyas.

Sa pag-abot sa mirespondeng mga polis patay nang nagbuy-od si Ephan tupad sa iyang motorsiklo nga naglunang sa kaugalingong dugo, ang mga samad pinusilan sa ulo, bukobuko ug ubang bahin sa kalawasan maoy gikatahong hinungdan sa iyang kamatayon.

Ang kapulisan naka-recover og onse ka mga basiyo sa bala sa kalibre .45 diha sa crime scene lakip na ang usa ka deformed slug.

Ang usa sa mga anak sa biktima nga diha gyud tupad sa iyang amahan atol sa pagpamusil padayon pang giatiman ug gialam-alaman gumikan kay na-shock kini sa nahitabo, gikatahong pagkakita sa bata sa nahitabo sa amahan naghilak kining nagdagan pauli sa ilang panimalay samtang ang laing anak niini ang nakasulod na sa school campus dihang nahitabo ang maong pagpamusil.

Dugang nahipos nga impormasyon gikan ni SPO1 Banugon giingong dunay kaso kaniadtong pagpatay ang biktima nga mao karon una nilang gituohang motibo pagpatay sa naulahi samtang susihon usab ang ubang anggulo sama sa personal nga nakaaway ug uban pa. – BANAT NEWS