Giulo pagpusil patay
CEBU, Philippines – Patay diha-diha ang usa ka 44-anyos nga lalaki human gipusil sa usa sa duha ka wala mailhing tawong nagsakay og motorsiklo kagahapon sa buntag diha sa CitiCenter sa barangay Kamagayan ning dakbayan.
Ang gibuk-an og ulo giilang si Lawford “Intsik” Sylianco, 44, taga barangay Subangdaku dakbayan sa Mandaue ug nag-abang sa nahisgutang lugar.
Nakaangkon og samad pinusilan sa iyang ulo, walang buk-ton ug sampot gikan sa kalibre .45 si Sylianco.
Si SPO1 Rogelio Dedamo ang imbestigador sa Homicide Section nga nahinabi sa mga tigbalita mibutyag nga ang biktima padulong nang mosulod sa nahisgutang dapit dihang usa sa mga gunman nga nagkalo ang mipusil kaniya tulo ka higayon.
Human sa pagpamusil daling miikyas sakay sa motorsiklo ang duha ka mga mamumuno.
Ang kapulisan nakakuha sa crime scene og duha ka mga kabhang sa kalibre .45 ingon man slug sa unahan sa gikahagbaan sa biktima.
Matud pa ni SPO1 Nedamo nga ila karong gisubay nga motibo mao ang pagdumot tungod kay giingong ang biktima nga naila sa pangalang Intsik gikatahong dunay gikaaway niadtong bulan sa Marso sa nahisgutang dapit ug nakadunggab usab kini niadtong miaging tuig.
Atol sa maong pagpamusil dunay usa ka ginganlan lang og “Ricky” ang natapsingan sa tuong bahin sa dughan, gikatahong nagdumili kini pagkooperar sumala pa ni PO2 Lou Pagara, usa sa mga imbestigador sa Homicide Section.
Samtang si Kapitan Celestino Avila sa barangay Kamagayan ang mibutyag sa mga sakop sa media nga ang biktima dunay gyuy mga kontra diha sa nahisgutang dapit. - Guam Logroño (BANAT NEWS)
- Latest
- Trending