Polis nanio'g armas sa sikyu

CEBU, Philippines – Usa ka polis ang gipasanginlang nanion og armas sa usa ka gwardiya sa usa ka dakong department store sa North Reclamation Area niadtong milabay’ng gabii.

Si Ariel Gonzago,33, gwardiya sa nahisgutang mall ug molupyo sa Punta Princesa ang midangop sa Mabolo Police Station aron ipa-blotter ang gikatahong pagpanion kaniya og armas ni PO2 Rico Caballero sakop sa Mandaue City Police Office Police Station 2.

Matud pa ni PO2 Aaron Pescadero sa Mabolo Police Station gipahunong sa nahisgutang gwardiya ang taxi nga adunay plate number GXG-427 nga gimaneho ni Caballero.

Apan imbes unta mangutana og unsay problema midiretso hinuon kini pagbunot og armas dayong banghag kaniya sa pag-ingon “wala pa ka kaila nako?”

Gumikan sa kahadlok wala nalang motingog ang gwardiya ug diha-diha miduol ang iyang head guard ug mimandong pakuhaan og plate number ang iyang taxi, dayong dangop ngadto sa Mabolo Police aron pagsumbong sa insidente.

Apan sa dihang nahinabi sa Banat News si Caballero kusganon kini mihimakak sa pasangil, sumala pa niini wala gyud siya manion og armas sa gwardiya.

Sumala pa niya ang gwardiya pa maoy miuna og hana pagbunot og armas atol sa pagbabag kaniya hinungdan migawas siya sa iyang taxi ug mipailang polis.

Dugang pa ni Caballero nga ang maong gwardiya nangayo paman gani kaniya og pasaylo sa pagbabag niini sa iyang taxi nga di pasudlan ang Gate 5.

Apan giingong ang head guard sa nahisgutang mall mao pay nasuko gumikan sa giingong pag-react niya sa pagbabag sa iyang taxi, gikatahong gimandoan dayon sa maong head guard ang gwardiya nga ipakuha ang plate number sa iyang taxi unit.

Gumikan niini nahitabo na usab ang ilang panaglalis tungod kay miinsister si Caballero kung unsay katungod sa maong head guard pagkuha sa iyang plate number nga di man deputized agent sa City Traffic Office Management.

“Nganong kuhaan man ko nila og plate number nga dili man sila deputized agents?” matud pa ni Caballero ug subling miinsister nga wala siya manion og armas gumikan kay nag-amping siya sa iyang trabaho isip polis.

Mibutyag usab si Caballero nga off-duty siya niadtong adlawa ug sideline niya ang pagmaneho og taxi aron madugang sa iyang ibuhi sa pamilya.

Samtang ang maong kaso girekomendar nga adto una idangop sa barangay. – BANAT NEWS