Masyador sa buwangan sa m'nilla gipatay

CEBU, Philippines – Gipusil patay ang usa ka masyador og manok ug laing usa pa ang napagan sa pagpamusil human sa derby nga gipahigayon didto sa barangay Calajoan, lungsod sa Minglanilla kagahapon sa ala 1 sa kaadlawon.

Ang biktima nga wala lung-i sa suspek hangtod namatay mao si Ramirani Cabuenas, 52, ulitawo apan dunay kapuyo ug molupyo sa Maharlika Village, Tabunok siyudad sa Talisay ug usa ka masyador sa buwangan.

Samtang laing napagan human sa maong panghitabo mao si Jonathan Cabrera, 28, ulitawo ug molupyo sa barangay Pungtod, sakop sa maong lungsod ug puntos sa maong derby.

Matud ni PO1 Jade Abrica sa Minglanilla Police Station sa dihang nahinabi sa Banat News subay sa blotter nga gibasehan niini ang biktima nga si Cabuenas kauban sa laing biktima nga si Cabrera nagdungan og panggawas pagkahuman sa gipahigayong derby aron sa pagpamauli ug pag-abot sa gawas sa buwangan nagpakyaw sila og habal-habal aron magpahatod sa ilang pinuy-anan.

Ang biktima nga si Cabuenas maoy nahimutang sa kinaluyohang bahin ug sa dihang dayon na untang molarga ang habal-habal nga ilang gisakyan kalit lang miduol ang mamumuno nga nagkawo dayon gidul-itan pagpusil ang biktima sa luyong bahin sa ulo ug human sa lanog nga boto sa armas nakahimo pa ang drayber pagpaandar sa iyang motorsiklo ug sirit pahilayo.

Subay sa inisyal nga imbestigasyon gigukod pa sa mamumuno ang mga biktima ug paglabay sa 30 metros natagak sa motorsiklo ang biktima ug gi-usban pa og pusil sa suspek ug maayong pagkaigo sa laing biktima nga si Cabrera una pa misibat sakay sa nag-parking nga motorsiklo nga dunay nagmaniho.

Pagresponde sa mga polis patay si Cabuenas nga nagkulob sa karsada dili pa kaayo layo sa buwangan samtang ang laing biktima nga si Cabrera gidala dayon sa Minglanilla District Hospital apan tungod sa seryosong samad pinusilan sa bukobuko niini gibalhin kini sa Vicente Sotto Memorial Medical Center (VSMMC) dinhi sa dakbayan sa Sugbo.

Ang kapolisan misentro karon sa nagpadayon nilang imbestigasyon nga dunay personal nga panagbingkil ang biktima ug mamumuno.

Dunay mga mitumaw nga tabi-tabi nga wala pa una gikonpirmar sa kapolisan nga ang biktima nakapago kini og mga pusta sa mga buwang diin nagsilbi siyang masyador. - Darrel A. Carumba (BANAT NEWS)