Mipalit sa away nakapatay
CEBU, Philippines – Usa ka lalake ang nakalas sa kapistahan sa barangay Dapitan sa lungsod sa Cordova human makakita og lalis sa usa ka lalaking mipalit sa away sa iyang higala ug mipusil sa biktima sa milabay’ng kaadlawon.
Ang biktima giilang si Tarsilo Dinoy, 32, residente sa maong dapit, samtang ang gitumbok nga mipusil kaniya mao si April Cabarse alyas "Ampe," 20, residente usab sa maong dapit.
Sa imbestigasyon ni SPO1 Laurencio Wagwag sa Cordova Police nasuta nga samtang nagselebrar sa kapistahan ang barangay Dapitan nakakita og lalis si Dinoy sa usa ka Jacob Tahanlangit.
Sumala pa sa kapolisan si Tahanlangit suod nga barkada sa suspek kinsa pagkakita sa duruha nga nagtinubagay og mga init nga pulong misambat usab kini hinungdan nga naapil kini sa kagubot.
Ang suspek gikatahong nakit-an dayong nagdali-daling milakaw pauli hinungdan nga mibiya nalang usab si Dinoy aron mouli.
Apan giingong pag-abot sa usa ka hilit nga dapit kalit gipusil ni Cabarse si Dinoy sa agtang ug sa kilid sa ulo hinungdan sa hinanaling kamatayon niini ug wala na madala pa sa tambalanan.
Human sa maong pagpatay wala na igkita si Cabarse sa ilang panimalay ug padayon pa kining gipangita sa kapolisan.
Matud pa ni SPO1 Wagwag bisan pa sa pagtagotago ni Cabarse padayon nilang ipasaka ang kasong murder batok kaniya. - Bong Soriano (BANAT NEWS)
- Latest
- Trending
