Baboyan sa Gun-ob nasunog

CEBU, Philippines – Mokabat sa P100,000 ang kadaot sa nahitabong sunog sa usa ka baboyan didto sa sitio Carajay, barangay Gun-ob, dakbayan sa Lapulapu sa miaging buntag.

Si FO2 Julius Gujar sa Bureau of Fire Protection (BFP) miingon nga nagsugod ang kayo sa ikaduhang andana sa edipisyo sa maong baboyan nga mao usab ang gipuy-an sa caretaker niini.

Dugang pa niya nga maayo nalang kay nakapanawag dayon sa kabomberohan si Samson Go ang tag-iya sa maong baboyan.

Si FO2 Gujar miingon nga mitabang usab ang mga trabahante sa maong baboyan sa pagpawong sa kayo pinaagi sa paghakot og tubig ug gibubo ngadto sa mao pay pagdilaab sa kayo.

Gani wala na makapasirit og tubig ang kabomberohan kay sa ilang pag-abot napawong na ang kayo.

Si FO2 Gujar miingon nga ilang gituohan nga faulty electrical wiring ang hinungdan sa maong sunog.

Gitataw niya nga nakaon gyud sa kayo ang tunga-tungang bahin sa edipisyo ug walay naangol o nakalas atol sa maong hitabo. -Romeo T. Limpangog (BANAT NEWS)