CEBU, Philippines - Gipaabot nga makagawas na sa tambalanan niining semanaha ang nahabiling lima ka mga biktima sa nahulog nga minibus sa usa ka pangpang diha sa barangay Busay ning dakbayan sa Sugbo niadtong miaging semana.
Kini maoy gibutyag ni Kapitan Jerry Guardo sa Sambag 1 nga maoy nag-atiman sa hospital expenses sa mga biktima.
Ang minibus nga gipanag-iya sa Sambag 1 gisakyan sa kapin sa 40 ka mga sakop sa Legion of Mary nga mga molupyo sa barangay Babag ning siyudad.
Walay swerte ang mga biktima kay inay mangaligo og dagat niadtong higayona, natugpa na hinuon sa nagkadaiyang tambalanan sa dakbayan human sa maong hitabo.
Duha ang patay sa nahisgutang insidente ug laing 24 ka mga biktima ang na-admit sa labing minos lima ka ospital sa siyudad.
Matud ni Guardo nga posibleng makagawas na sa tambalanan niining semanaha ang nahabiling lima ka mga biktima nga naglakip sa minibus driver nga si Rufino Secretaria.
Samtang ang nakalas sa insidente nga sila si Jessan Gabisay, 8 anyos ug Margie Mabini, 44 anyos, gitakda na usab nga ilubong niining semanaha.
“Giatiman man gyud nato silang tanan, ato lang giuna ang kahimtang sa mga biktima nga anaa pa sa tambalanan,” sumala ni Guardo.
Samtang gipasalig ni Guardo ang pagsumiter og maintenance report sa nahulog nga minibus ug sa uban nilang mga sakyanan ngadto sa City Council.
Kini subay usab sa nag-ung-ong nga resoluyson ni Konsehal Edgardo Labella nga nangayo og maintenance report sa mga sakyanan sa Sambag 1 sulod sa miaging unom ka buwan. - BANAT NEWS