Blackout miigo sa Visayas

CEBU, Philippines – Usa ka halapad nga blackout ang miigo sa tibuok Kabisay-an sa kagahapon sa buntag hangtud sa hapon ug pipila ka mga dapit ang wala gihapon mabaliki og suga kagabii.

Ang corporate communications officer sa National Grid Corporation of the Philippines (kanhi Transco) nga si Carmela Castillo sa pakighinabi sa Banat News sa telepono kagahapon sa hapon mibutyag nga tibuok Kabisay-an ang naapektahan sa brownout.

Sa gipadalang pamahayag ni Castillo sa Banat News kagahapon nagkanayon nga ang gitawag og 230KV gikan sa Marshalling padulong sa Tabango, Leyte Line II mi-tripped samtang ang transmission line 1 naka-off.

Ang 230KV powerlines maoy nagsuplay sa kuryente gikan sa Leyte ngadto na sa Cebu ug uban pang mga isla sa Kabisay-an nga nasakop sa maong grid.

“As of now we are conducting islanding operation to restore power,” sumala pang Castillo.

Ang islanding operation mao ang pagpaandar sa tanang mga power plants sa matag isla sa Kabisay-an aron maoy mo-suplay sa kuryenteng gikinahanglan sa maong mga dapit samtang di pa mabalik ang koneksyon gikan sa Leyte.

Ang Rehiyon -7, konektado sa Cebu-Negros-Panay gikan sa power surplus sa geothermal power plant sa Tongonan Leyte.

Matud pang Castillo nagsugod ang blackout alas 9:38 sa buntag kagahapon ug human masugdi ang islanding operations hinay-hinay nang nabalik ang kuryente sa pipila ka mga dapit sa Kabisay-an.

Atol sa pagsulat ning balita, alas 2 sa hapon, 25 porsiyento palang sa suplay sa kuryente ang nabalik sa Sugbu samtang sa isla sa Bohol 40 porsiyento ug ang sa Negros partial palang gihapon sumala pang Castillo.

Sa samang higayon ang 230 KV transmission line 1 gikan sa Marshalling ngadto na sa Tabango gipakusgan ug gisunod dayon ang Tabango-Talisay submarine power cable, sumala pa sa gibutyag ni NGCP vice president for Visayas Systems Operations, Crispin Lamayan.

Samtang kagahapon, gialerto sa Cebu City Bureau of Fire Protection ang mga frontline fire fighters niini sa bisan unsang alarma sa sunog gumikan sa maong blackout.

Si Supt. Ismael Codilla, city fire marshal sa dakbayan sa pakighinabi sa Banat News nagkanayon nga dako ang peligro sa sunog gumikan ka yang mga tawong wala pa mabaliki sa kuryente mogamit gyud og lampara ug mga kandida nga sagad maoy hinungdan sa mga sunog.

“Alert man ta karon (kagahapon) kay delikado ilabi na sa gabii kay mogamit man gyud og lampara ug kandila ang mga tawo,” asoy pang Codilla.

Hinuon bugtong mga non-frontline fire fighters ug kadto lang mga importanteng rason ang gitugutan ni Codilla nga maka-leave sa iyang mga sakop karong summer.

Sa laing bahin, gumikan sa maong blackout napawong ang tanang mga traffic lights sa dakbayan sa Sugbu hinungdan nga daghang mga karsada ang nangabara sa traffic sa mga sakyanan.

Si Joanie Sarona, operator sa City Traffic Office Management kagahapon mibutyag nga ang mga intersections sa amihanang bahin sa dakbayan sama sa J. Luna Soriano; ug J.Luna sa Mabolo; Gen. Maxilom Avenue ug sa MJ Cuenco Ave. sa Plaza Independencia ang nakasinati og grabeng pagbara sa trapiko.

Gumikan niini nagkapuliki ang CITOM sa pagpahimutang sa ilang mga sakop sa mga intersections aron di na mapun-an pa ang mga dalang mabara gumikan sa blackout.

Wala hinuon kaayo makasinati og susamang problema sa trapiko ang habagatang bahin sa dakbayan gumikan sa kalagpad sa mga dalan niini. - Edwin Ian Melecio uban sa report ni Lesley Caminade (BANAT NEWS)