CEBU, Philippines - Si Agriculture Secretary Arthur Yap dili mokandidato sa pagkasenador ubos sa administration party ni Presidente Gloria Macapagal Arroyo kay adto nalang siya mokandidato sa pagkongresista sa ikatulong distrito sa probinsiya sa Bohol.
Kini human si Yap moparehistro sa Comelec Office sa lungsod sa Loboc, Bohol tulo ka semana ang nakalabay.
Si Bohol Vice Governor Julius Herrera mikonpirmar niini tungod kay ang Loboc maoy natawhang lugar sa asawa ni Yap.
Gani nasayran nga si Yap mibubo na og daghang mga proyekto pinaagi sa Department of Agriculture (DA) sa ikatulong distrito sa Bohol nga may 19 ka mga kalungsoran.
Si Mayor Welson Pajo, usa sa mga mayor sa maong distrito, giingong mao gyuy giistoryahan ni Yap bahin sa iyang laraw nga magkongresista sa maong lugar.
Busa posibling makaatbang sa sekretaryo ang incumbent nga kongresista sa tresiro distrito nga si congressman Adam Jala.
Si Yap maoy speaker sa 6th Annual General Assembly sa Bohol Farmers' Multi-Purpose Cooperatives (BOFAMCO) niadtong Sabado sa buntag kauban ni kanhi Senate president Manuel Villar.
Sa pakigkukabildo sa Agriculture Secretary ngadto sa mga miyembro sa kooperatiba, si Yap mihangyo kanila nga dili siya pakalimtan sa umaabot nga election sa tuig 2010. - Chester Abadilla (BANAT NEWS)