Mga silingan sa namatay sa 'meningo' nangabalaka

CEBU, Philippines - Gibati na karon og pagpanghadlok ug kabalaka nga matakdan ang mga silingan sa 65 anyos nga ginang nga namatay sa sakit nga meningococcemia didto sa barangay Luyang, lungsod sa Carmen bisan pa man og gipalubong dayon ang minatay niadtong Martes sa hapon human mamatay pagka-Lunes sa gabii sulod sa Vicente Sotto Memorial Medical Center (VSMMC).

Kadaghanan sa mga silingan sa biktima nga si Amecia Hermoso nahadlok na bisan sa pagpaduol sa mga kabanay niini didto sa maong lugar ug maglikay likay na kini sa higayon nga dunay sakop sa kabanay sa biktima ang mogawas aron dunay paliton sa tindahan.

Ang nurse-on-duty sa municipal clinic sa lungsod sa Carmen nga si Camia Villamor sa dihang nahinabi sa Banat News mipadayag nga normal lang kini nga mobati og kabalaka ug pagpanagana ang mga silingan sa maong pamilya tungod kay bag-o pa ang maong panghitabo ug lab-as pa sa ilang panumduman ug naglikay lang kini aron dili matakdan.

Gani, tungod niini ang municipal health officer nga si Dr. Elmer Batao mitahas karon og sakop sa barangay health worker (BHW) ingon man midwife nga maoy magmonitor sa mga kabanay sa pamilyang Hermoso.

Gimanduan sa municipal health officer ang mga kabanay sa pagpa-check up dayon sa sentro sa higayon nga dunay sakop sa pamilya niini ang magsakit sama sa pagkahilanat nga moresulta sa pagpanglagum sa panit ug dunay magpat-ak pat-ak nga puwa sa panit nga maoy sintomas sa sakit nga meningococcemia.

Matud pa pagkakaron halos naglikay likay na ang tanang mga silingan sa pamilyang Hermoso didto sa maong lugar nga pulos nangahadlok nga matakdan sa maong sakit.

Giangkon hinuon ni Villamor nga nasurpresa gyud sila sa pagtumaw sa maong sakit sa ilang lugar nga sukad ma sukad karon pa gyud kini mahitabo sa ilang lungsod.

Hinuon gipadayag ni DOH-7 regional director Dr. Susana Madarieta nga gipadad-an na nila ug gipahatagan na nila og mga tambal ang kabanay sa pasyente isip proteksiyon aron dili matakdan sa maong sakit bisan og wala gyud kini hingpit nga makonpirmar kun meningococcemia ba gyud ang gikamatyan sa pasyente.

Matud ni Madarieta nga gitratar lang nila nga meningococcemia ang maong sakit tungod sa mga sintomas niini sama sa pagpanglagum sa panit nga dunay pagpat-ak pat-ak nga magpuwapuwa nga nakapaluya sa pasyente hangtod sa pagkamatay niini. - Darrel A. Carumba (BANAT NEWS)