CEBU, Philippines - Nangreklamo na ang mga V-Hire nga magbiyahian sa habagatang bahin sa lalawigan sa Sugbu nga miinsister pag-agi sa South Road Properties (SRP).
Kini tungod kay walay hunong ang gihimong pagpanakop sa mga traffic enforcers kanila hinungdan nga ang mga operators giingong mihangyo na ngadto sa kagamhanan sa dakbayan nga tugutan ang ilang mga unit sa pag-agi sa SRP.
Si Citom executive director Arnel Tancinco mibutyag nga wala pa nila kini karon atimana sanglit ilaha pang tun-an ang maong hangyo.
“Gi-brought up man na ni Paul Villarete sa Citom board meeting namo nga i-reassess, wala pa lang mahuman,” sumala ni Tancinco.
Nasayran nga gidid-an sa Citom ang tanang pampublikong mga sakyanan nga moagi sa SRP gawas lang sa mga taxi unit, tungod kay gawas sa taxi, ang tanang public utility vehicle dunay designated loading ug unloading area gawas nga dunay rota.
Ang mga v-hire miinsister nga gusto silang makalikay sa traffic congestion diha sa Natalio Bacalso Avenue paingon sa Poblacion-Pardo.
Apan gikabalak-an nga kun sila tugutan mangayo usab og exemption ang ubang mga pampublikong sakyanan nga makaagi sa SRP.
Sa kasamtangan, padayong manakop ang mga traffic personnel nga gidistino sa SRP niadtong mga sakyanan nga wala tuguting makaagi sa maong lugar. - Elly Bolonos (BANAT NEWS)