Kamatayon sa masiao operator gisusi

CEBU, Philippines - Ang pangulo sa kapulisan sa lalawigan sa Sugbu Sr. Supt. Carmelo Valmoria nipadala’g mga imbestigador sa lungsud sa Badian aron imbestigaran ang kamatayon sa gipasanginlang masiao operator nga si Richelo “Boboy” Velos.

Nasayran nga si Velos namatay human kini maglisod sa pagginhawa atol sa pagronda sa panimalay niini nila ni Chief Insp. Ma. Elma Delos Santos, hepe sa Provincial Investigation Branch (PIB) sa Cebu Provincial Police Office pinasikad sa search warrant nga giisyu ni RTC Judge Estella Sinco may kalambigitan sa illegal nga sugal.

Matud pa ni Valmoria, nga si Velos usa gyud sa mga target nila gumikan kay dili lang kini ordinaryong masiao operator tungod kay lapad ang operasyon niini nga naggikan sa Badian hangtud sa Argao.

Gikasubo sa kapolisan nga namatay si Velos sa maong pagpangronda nga gidudahang giatake sa sakit sa kasing-kasing.

Ang kapolisan midala kang Velos ngadto sa hospital dihang naabtan kining naglisod sa pagginhawa luyo sa ilang balay ug nagpatabang, wala usab mapakita sa mga polis ang search warrant kang Velos tungod sa hitabo.

Hinuon ang kapulisan nakakuhag ubay-ubay nga kagamitan o tally sheet sa illegal nga sugal ingon man ang mga sensilyo nga mokantidad sa P2, 050.

Apan giklaro niini nga wala sila masayod sa nanggawas nga report nga adunay P70 mil sa namatay nga nahanaw.

Gipasabot ni Valmoria nga base sa inisyal nga nahatag nga impormasyon sa iyang mga sakop dunay salapi sa namatay’ng si Velos diha sa iyang bulsa atol sa pagdala kaniya sa tambalanan.

Subay niini si Valmoria niawhag sa mga tagtungod nga ipa-ubos sa autopsy ang patay’ng lawas ni Velos aron usab matino kun unsa gyu’y hinungdan sa kamatayon niini.   (BANAT NEWS)