Cebu - Gitakdang pakigtagboan ni Cebu City Acting Vice Mayor Hilario Davide III ang mga langyaw’ng tinun-an dinhi sa dakbayan ugmang adlawa.
Kini agi og pagsanong sa gisangon ni acting Mayor Michael Rama kaniya human mobisita sa City Hall ang ambassador sa Iran nga si Ali Mojtaba Rouzbehani.
Ang nahisgutang ambassador nangayo og kasigurohan kang Rama alang sa siguridad sa mga Iranian nga ania dinhi sa siyudad.
Kini human pusila-patay ang usa ka Iranian student niadtong Enero 22 nga si Ashkan Aminian diha sa Juana Osmeña Extension ning dakbayan.
Pakyas hinuon si Rouzbehani sa iyang tuyo tungod kay dili makapasalig si Rama sa siguridad sa mga langyaw dinhi sa siyudad partikular na sa mga Iranian.
Apan gipasabot sa acting mayor ngadto sa ambassador nga siya, uban sa kapulisan, seryuso sa pag-atiman sa problema sa siyudad labot sa kriminalidad.
Usa sa nahuna-hunaan ni Rama mao ang pagpatawag sa mga langyaw’ng tinun-an aron kahatagan og mga pahimangno kalabot sa ilang siguridad.
Si Davide nga maoy gitahasan ni Rama niini, nagpadala na og suwat ngadto sa nagkadaiyang kolehiyo ug unibersidad ning siyudad aron mao nay mopahibawo sa ilang mga langyaw’ng tinun-an nga makigtagbo kanila ang mga opisyal sa dakbayan.
Nagkanayon si Davide nga iya usab nga patambungon si Cebu City Police Office Director Senior Superintendent Patrocinio Comendador sa gitakdang tigom. - Elly Bolonos (BANAT NEWS)