P1M pundo giandam sa Siloy para Sinulog

CEBU - Kapin sa usa ka milyon ka pesos ang gigahin sa Alcoy Siloy sa lungsod sa Alcoy sa ilang subling pagsalmot sa Sinulog 2009 sa petsa 18 sa Enero sunod tuig aron depensahan ang ilang korona.

Ang coordinator sa Alcoy Siloy Konsehal Ailey Romarate Costin nibutyag dihang nahinabi sa Banat News nga gikuha gihapon nila ang usa sa mga banggiitang choreographer dinhi sa siyudad sa Sugbu nga si Victor Cuenco alang sa ilang ika-tulo ka tuig nga pagsalmot sa Sinulog.

Si Cuenco maoy nagsilbing choreographer sa Alcoy Siloy sa Sinulog 2008 diin mao kini nidaug isip kampeyon sa Sinulog Mardi Gras nga nibulsa og P.5 milyon nga ganti.

Gibutyag ni Costin nga ang sobra sa usa ka milyon ka pesos nga gikinahanglan nilang pundo maoy motubag sa tanang gastuhan alang sa costume sa dili momenus 100 ka mga dancers.

Lakip na ang gastos sa inadlaw-adlaw nga pag-ensayo apil na ang ilang pletihan paglarga dinhi sa dakbayan ug pagkaon sa adlaw sa Sinulog ug ang bayranan sa choreographer ug sa drummers.

Nunot niini gitug-an ni konsehal John Osorio chairman sa committee on tourism nga numero-unong tumong nila pagsalmot sa Sinulog aron pag-promote sa turismo sa ilang lungsod.

Gidugang ni Osorio nga bag-uhay lang giaprubahan sa konseho ang supplemental budget nga P385 mil alang sa gastuhan sa mga contingent.Samtang nihatag sab og P300 mil ang probinsya sa Sugbo pinaagi ni Gobernador Gwendolyn Garcia, ingon man P100 mil gikan ni Kongresista Pablo Garcia sa segundo distrito wala pay labot sa pipila ka mga senador ug kompaniya nga ni-sponsor sa ilang contingent.

Giklaro ni Costin nga apil sa ilang katuyoan pagsalmot sa Sinulog aron paghalad sa Senyor Santo Niño apan tungod kay nahimo silang kampeyon sa Sinulog karung tuiga angay lang usab nga ilahang depensahan ang maong korona. (Darrel Carumba)   (BANAT NEWS)