CEBU - Patay ang usa ka 25 anyos nga lalake ug naangol usab ang amahan niini dihang gidasmagan sa usa ka “hit and run” nga multicab didto sa barangay Calape lungsod sa Daanbantayan alas 12:30 sa kaadlawon atol gyud sa Pasko.
Ang biktimang namatay mao si Niño Garbo Belarmino, 25, minyo, samtang ang naangol niyang amahan mao si Raul Oliveros Belarmino, hingkod, nagtrabaho sa usa ka vulcanizing shop ug pulos taga Calape.
Samtang ang multicab nga midasmag kanila gihulagway lang nga kolor puti, walay plate number ug walay nakaila sa drayber.
Si PO2 Edwin Dignos sa Daanbantayan Police Station mibutyag sa Banat News nga ang amahan ug anak gikan nga nag -videoke ug naglakaw kini sa karsada nga nag-agbayay paingon sa ilang balay.
Apan matud pa sa kapolisan nga kalit lang kining gidasmagan sa multicab nga nagsunod kanila hinungdan sa pagkalagpot ni Niño sa uma sa daplin sa karsada, samtang si Raul ang nabalintong kini pila ka higayon sa karsada.
Human manglupad ang duha, gibiyaan lang kini sa drayber ug gipakusgan hinuon sa pagpadagan ang iyang multicab pahilayo sa maong lugar.
Ang duha gihatod sa mga molupyo ngadto sa Daanbantayan District Hospital apan si Niño wala na makaabot nga buhi sa maong tambalanan.
Padayon pang gipangita sa kapolisan ang kriminal nga drayber. (BANAT NEWS)