Media padepensahon sa prostitute

CEBU - Nakigtagbo kagahapon ang International Justice Mission (IJM)-Cebu sa mga sakop sa media aron ikasabwag ang mga kasayoran bahin sa pagpanalipod sa mga biktima sa human trafficking.

Ang maong panagtagbo gipahigayon didto sa Laguna Café sa Ayala Center diin didto ipasabot ang bahin sa pagpatuman sa Republic Act 9208 o Anti Trafficking Act of 2003 aron masanta ang pagkaylap sa prostitusyon dinhi sa Metro Cebu.

Si Atty. Andrey Sawchenko, kinsa maoy Field Officer Director sa IJM midetalye sa mga kasayuran ngadto sa taga media bahin sa prostitusyon ug ingon man ang mahimong sangputanan niadtong malambigit niini.

 Ang IJM mipasidaan niadtong mga illegal recruiter nga kapasakaan gihapon sila og kaso bisan pa kun ang ilang gi-recruit nga babaye maoy miboluntaryo nga magprostitusyon.

Matud pa ni Atty. Samson Inocencio Jr., Director of Legal Interventions sa IJM-Cebu, nga ang Pilipinas usa ka international sex tourist destination.

Nasayran nga matag tuig adunay tag 300,000 ka mga Japanese tourist   ang moduaw nganhi nga maoy naghatag og dakong labad sa ulo sa gobiyerno sa nasud.

Si Atty. Rosemarie Verzosa, usa sa mga lecturer sa IJM miawhag sa taga media nga aron makatabang sa pagprotiher sa dungog sa mga prostitute, dili angayang hisgutan ang ilang mga ngalan sa mga balita sa radyo, television ug pamantalaan aron mapanalipdan ang ilang pagkatawo.

Mipasalig ang outgoing president sa KBP nga si Leo Lastimosa nga andam motabang ang 30 ka estasyon sa radyo ug telebisyon nga miyembro sa Kapisanan ng mga Brodkaster ng Pilipinas sa pagsibya sa mga proyekto sa IJM.

Ang International Justice Mission usa ka non-government organization nga motabang sa mga kabus ilabi na sa mga tawo nga nabiktima sa prostitusyon.   (BANAT NEWS)