Gikan sa inom gipusil

CEBU - Usa ka tawo nga gikan sa inom, gipusil sa wala hiilhing kriminal didto sa sitio Camp 5, Barangay Manipis, dakbayan sa Talisay kagahapon sa kadlawon.

Si PO2 Lino Diez sa Talisay City Police Station miila sa biktima nga si Merio Torres, 30, nga taga Campo 5 kansang lawas gilapsan sa bala sa wala pa hiilhing kalibre sa armas de fuego.

Sumala sa kapolisan nga ang biktima nakig- inom sa iyang uyoan ug mga pag-umangkon.

Human sa ilang inom, gihatod niya ang iyang uyoan sa balay niini ug dihang mipauli na siya sa ilang balay nga dili kaayo layo sa balay sa iyang uyoan, giluthang siya samtang nagsubay sa dalan   sa wala hiilhing kriminal.

Nasabak ang biktima sa tuong bahin sa buko- buko ug milapos ang bala sa iyang dughan.

Ang biktima anaa karon sa Don Vicente Sotto Memorial Medical Center ug giatiman pa sa mga doktor.

Padayon pa karon ang kapolisan sa pag-imbistigar sa maong hitabo. – BANAT NEWS