Dalaga misukol sa mga rapist gipusil

CEBU - Napusilan na hinuon ang usa ka dalaga human kini misukol sa dihang gisaka sa balay sa tulo ka mga suspek ug tabangan unta sa paglugos didto sa Sitio Campung, barangay Bawo, lungsod sa Sogod niadtong Martes sa alas 8 sa gabii.

Ang biktima nga samaron nga midangop sa kapolisan giubanan sa iyang amahan nga mao si Nila Armiccin Oriendo, 36, dalaga apan dunay kapuyo samtang ang iyang amahan nga maoy mikuyog kaniya sa pag-report sa kapolisan mao si Sozimo Oriendo, pulos molupyo sa nahisgutang lugar.

Matud ni PO3 Elymar Mendoza sa Sogod Police Station sa dihang nahinabi sa Banat News subay sa blotter nga gibasehan niini ang biktima nag-inusara lang sa pagkatulog sulod sa payag niining balay tungod kay mitrabaho ang iyang kapuyo.

Nabantayan sa biktima nga gipugos og guba ang kahoy nga pultahan sa ilang balay ug sa dihang nakasulod na ang mga suspek nadunggan pa niini ang usa nga nagkanayon nga “kalingawan nato ni bay”.

Matud sa biktima tungod kay lamparilya lang ang ilang suga wala siya makaklaro sa panagway sa tulo ka mga suspek nga mitabang og gunit kaniya, usa diha sa abaga ug ang duha maoy misuway og aswat niya aron siya pahigdaon og balik apan misuway gyud siya sa pagsukol dungan ang pagsinggit singgit pagpangayo og tabang sa mga silingan nga nagpuyo 50 metros ang gilay-on.

Mibunot unta og pistola ang usa sa mga suspek ug gitionan ang biktima aron mohilom kini apan giwakli kini sa biktima hinungdan nga mibuto og maayong pagkaigo sa walang kamot hinungdan nga natarantar ug nagkatibulaag og dagan ang mga suspek ilabi na sa dihang nakamatikod kini nga dunay usa ka tawo nga miabot nga gihinganlan og Ciano nga silingan sa biktima. - Darrel A. Carumba (BANAT NEWS)