CEBU - Mga sakop sa Alpha Kappa Rho fraternity dinhi sa Sugbu misuporta sa ipahigayong “Drug Consciousness Week” nga sugdan karong umaabot nga Domingo, Nov. 9 ngadto na sa petsa 15 ning bulana.
Matud pa ni Dangerous Drugs Board undersecretary Atty. Clarence Paul Oaminal kinsa mao usab ang legal officer sa Akrho dunay mga kalihukan may labot sa kampanya batok sa illegal nga drugas nga pasiugdahan sa city government sa dakbayan sa Sugbu.
Sa maong usa ka semanang kalihukan aktibong mosalmot ang mga sakop sa ilang grupo pinaagi sa pagbisita sa mga barangay sa dakbayan sa Sugbu nga nasuta sa PDEA-7 nga naghitak sa problema sa illegal nga drugas.
Ang maong kalihukan may temang “Nagkaisang Pamilya Laban sa Droga” ug tuyo sa ilang grupo nga motambag sa kabatan-unan sa mga dapit nga ilang bisitahon kabahin sa makadaut nga epekto sa maong bisyo.
Subay niini ang regional president sa grupo nga si Richard Buscayno mipahibalong dunay himuong “Lakad laban sa Druga” atol sa maong adlaw ug naglaraw silang moapil niini.
Kabahin sa bati nga kasinatian sa publiko sa Akrho sa mga nangaging mga bulan, si Buscayno mipasalig nga walay kagubot nga mahitabo ug misaad nga unayon niini og silot ang mga sakop nga mohimo niini. – BANAT NEWS