CEBU - Pormal na nga giablihan ang Macapagal Durano Fishport sa dakbayan sa Danao pinaagi ni Pres. Gloria Macapagal-Arroyo sa maong fishport kagahapon sa udto.
Atol sa maong pormal nga presentasyon sa maong proyekto gipasabot ni Mayor Ramon “Nito” Durano III sa Danao ngadto ni Pres. Arroyo nga ang balor P87 milyones nga fishport gikan sa panudlanan sa Presidential Social Fund diin mikabat sa P40 milyones ug ang P37 milyones gikan sa Philippine Fisheries and Development Authority ug ang P11 milyones gikan sa panudlanan sa Danao.
Gibendisyonan ang maong fishport ni Obispo Emilio Bataclan.
Matud pa ni Durano nga gisugdan ang maong proyekto niadtong tuig 2004 sa bulan sa Pebrero ug natapos niadtong Sept. 15, 2008.
Ang usa ka ektaryang luna sa reclamation project maoy gitukoran sa maong fishport ug gipaabot nga makahatag og dakong kaayuhan sa mga dagkong panagatan nga makapatumod sa ilang mga kuhang isda ngadto sa dakbayan sa Danao.
Ang fisport nga mabutang nga municipal port isipon na unya kini nga “bagsakan center” sa mga isda gikan sa amihanan.
Gani unom na sa mga dagkong negosyante sa pangisda mipasalig na sa ilang pagtumod sa mga isda sa fishport sa Danao ug dili na sa Pasil fishport.
Lakip sa makabenepisyo mao ang mga namaligya og tinapa nga isda gumikan kay ang ibabaw nga bahin sa maong fishport gihimo usab kini nga stalls alang sa maong naninda og sinugbang isda ug uban pang nilutong isda.
Ang mga naninda sa daplin sa kadalanan pabalhinon na sa ibabaw’ng bahin sa fishport gumikan sa kahagip-ot usab sa National Highway sa Danao nga delikado sa disgrasya.
Nalipay pag-ayo si Pres. Arroyo sa katukoran sa maong fishport.
Didto maniudto ang presidente sa panimalay sa mga Durano ug mibiya kini paingon sa Shangri-la Hotel and Resort alang sa panagtigum sa World Trade Organization. – BANAT NEWS