Gitigbas, gitiwasan namatay

CEBU - Gidunggab dayon gitiwasan og tigbas og pinote hangtod nga namatay ang usa ka 19-anyos nga batan-on sa tawong miatang kaniya diha sa barangay San Rafael lungsod sa Barili, Cebu niadtong Huwebes sa alas 4:20 sa hapon.

Ang biktima nga nakaangkon og duha ka samad tinigbasan sa nawong ug samad dinunggaban sa tiyan nakit-ang nagbuy-od nalang sa dalan giilang si Garry Desierto, molupyo sa nahisgutang lugar.

Samtang ang suspek mao si Placedo Canete, 46, silingan ra sa biktima nga dugay nang gikabangi niini.

Sa imbestigasyon paingon na mopauli si Desierto apan gibabagan sa suspek ug gidunggab ug naigo sa tiyan ug dihang natumba na gitiwasan og tigbas hinungdan sa hinanali niining kamatayun.

Nisuway unta sa pag-eskapo ang suspek apan nasakpan ra kini atol sa gihimong hot pursuit operation sa kapulisan ug gibalhug sa detention cell sa kapulisan sa Barili.

Gibutyag ni PO3 Hector Veloso sa Barili Police dihang nahinabi sa Banat News gikatahong nasuko ang suspek sa biktima ug sa tulo ka barkada niini tungod sa pagpamato nila sa iyang balay.

Dihang iyang gigukod wala niya sila maapsi apan dangtan pila ka oras subling nibalik ang grupo ug gibato na usab siya hinungdan nga iyaha kining gigukod hangtud nga iyang nababagan ug natigbasan. – BANAT NEWS