CEBU - Napusilan ug nalandig sa tambalanan ang usa ka mahuyang nga empleyado og beauty parlor human kini nisukol ug nakiglayog sa suspek nga buot unta motulis kaniya sa barangay Abugon lungsod sa Sibonga niadtong Martes sa alas 8:30 sa gabii.
Ang biktima mao si Felimon Suico, 25,molupyo sa Sangat San Fernando nagtrabaho isip beautician sa usa sa mga parlor sa maong lugar.
Matud ni PO3 Antonio Sanchez sa Sibonga Police dihang nahinabi sa Banat News sakay sa motorsiklo niini ang biktima kauban ang lain pang mga mahuyang apan sa paghunong nila kalit usab niabot ang duha ka suspek nga sakay usab og motorsiklo nga kolor blue nga walay plaka.
Ang angkas niini maoy daling nanaug ug niduol sa biktima dayong tion og armas dungan pagmandong ihatag ang cellphone niini.
Apan daling giilog sa biktima ang armas sa suspek ug nakiglayog kini hangtod nga nikanaug sa motorsiklo ang ikaduhang suspek dayong pusil sa biktima duha ka higayon sa tuong bitiis ug walang bukton. – BANAT NEWS