Rama larga sab

CEBU - Gitakda usab nga molarga paingon ngadto sa gawas sa nasud si Cebu City Vice Mayor Michael Rama ugmang adlawa.

Kini taliwa sa gitakdang pagbiyahe ni Mayor Tomas Osmeña ngadto sa Estados Unidos karong adlawa alang sa pagpaubos og laing physical examination.

Matud ni Rama nga ang iyang official travel una nang natakda sa wala pa ang plano sa mayor pagpatambal ngadto sa Amerika.

Ang bise mayor giimbitar sa mayor sa Yeosu City sa South Korea nga sister city sa dakbayan alang sa pagtambong sa nagkadaiyang kalihokan sa maong dapit.

Kini sama sa National Sports Festival sa Yeosu nga giingong tambungan usab sa presidente sa nahisgutang nasud nga si Lee Myung-Bak.

Lakip usab sa gipasigarbo sa mayor sa Yeosu nga si Oh Hyun-sup ngadto kang Rama mao ang nagkadaiyang cultural ug art events sa ilang dapit.

Nagkanayon si Rama nga iyang gidawat ang imbitasyon sa mayor sa Yeosu aron mapalig-on pa usab ang relasyon sa duha ka siyudad.

“Muadto ta aron ma-establish ang atong maayong relasyon tali sa Yeosu kay ato man nang sister city unya makabisita pud ta og ubang local government unit,” sumala ni Rama.

Wala hinuoy laing opisyal sa siyudad nga mokuyog sa bise mayor ngadto sa Yeosu City  gawas sa pipila ka mga negosyante dinhi sa Sugbu.

Lima ka adlaw ang pagbiyahe ni Rama ngadto sa nahisgutang siyudad sa South Korea ug gipaabot nga mahibalik ang bise mayor unya sa Martes sunod semana.

Ang automatic nga mohulip kang Rama isip acting mayor sa dakbayan mao si Konsehal Hilario Davide III ug acting vice mayor usab si Konsehal Nestor Archival. (BANAT NEWS)