CEBU - Nabuslot ang abaga sa usa ka drayber sa habal-habal dihang nasabak kini sa bala sa armas sa wala hiilhing tawo nga miluthang kaniya sa Sitio Bantayan, barangay Tuyom dakbayan sa Carcar niadtong miaging kaadlawon.
Ang biktima giila sa kapolisan nga si Wendell Camuta, hingkod nga taga Sitio Relis, barangay Cambuntan sa nahisgutang dakbayan.
Nakaangkon kini og samad pinusilan sa iyang toong abaga sa wala pa matinong armas de fuego.
Gipahayag sa biktima ngadto sa kapolisan nga naghatod siyag duha ka mga pasahero nga lalake ug babaye ngadto sa Tuyom gikan sa barangay Poblacion.
Apan sa iyang pag-abot sa Sitio Bantayan, usa ka wala hiilhing tawo kinsa nagbarog-barog sa daplin sa karsada ang kalit lang mipusil kaniya hinungdan nga maayong pagkabuslot sa iyang toong abaga.
Matud pa sa biktima nga maayo nalang kay nakalihay siya kay kun wala pa, malagmit buak gyud ang iyang bagolbagol.
Ang biktima naglibog kun nganong gipusil siya sa maong tawo nga wala man siya makahinumdom nga may gikakontra siya sa maong dapit.
Ang kapulisan sa dakbayan sa Carcar padayon pang mihimog follow-up sa maong insedenti. – BANAT NEWS