CEBU – Kapin sa napulo ka mga sundawo nga sakop sa 43rd Infantry Batallion nga gipadala didto sa Mindanao ang nangaangol sa engkuwentro tali sa rebeldeng sakop sa Moro Islamic Liberation Front (MILF) didto sa Lanao Del Norte karun lang semanaha.
Ang 43rd IB nga nakabase sa lalawigan sa Bohol kaniadto gipadala didto sa Mindanao niadtong tunga-tunga sa bulan sa Agosto agig dugang puwersa sa nahaunang gipadala nga 46th IB sa maong isla aron gukdon ang mga sakop sa MILF nga gipanguluhan nila ni Kumander Ameril Umbra Kato ug Kumander Abdulrahman Macapaar alyas Kumander Bravo.
Si Lt. Col. Juvymax Uy, commanding officer sa 43rd IB mitug-an nga kinse niya ka mga sakop ang nasamdan atol sa engkuwentro sa MILF.
Apan onse niini ang nakaangkon lang og gagmay nga samad apan nakabalik na gani sa ilang trabaho human natambalan dayon ang ilang samad.
Matud ni Lt. Col. Uy ang upat niya ka sundawo gihulagway nga slightly critical hinungdan gidala sila ngadto sa tambalanan sa kaulohan aron maatiman og maayo ang ilang mga samad.
Dugang pang Uy nga sa pagka karun dili na sila ubos sa pagdumala sa Central Command samtang ug ilawom na sila karun sa Western Mindanao Command
Hinuon giklaro ni Uy nga walay angayan nga ikabalaka sa iyang mga sakop. Pipila na ka semana ang nakalabay ang batalyon ni Uy maoy nakasakop sa kampo ni Bravo human nila kini paulani og balas a kanyo ug mortar ug gisulong sa Army.
Si Lt. General Pedro Ike Inserto Commanding officer sa Central Command nagkanayon nga dili pa gyud puwede mobalik ang duha ka batalyon ang 46th IB UG 43rd IB.