Usa ka bana nga mao pay pag-abot gikan sa trabaho naghikog kay nagkalalis ug ang iyang asawa, sulod sa ilang balay didto sa Dasun-I, Das, siyudad sa Toledo niadtong Sabado sa alas 3:45 sa kaadlawon.
Ang biktima mao si Regidor Gesite, 41, samtang ang iyang asawa mao si Cristy Gesite, hingkod ang panuigon.
Matud ni PO1 Celso Maquidato sa Toledo City Police Station nga mitug-an kanila ang 10 anyos nga anak sa biktima nga si Carlo Gesite nga nianang alas 11:00 sa kagabhion niadtong Sabado namat-an niyang naglalis ang iyang inahan ug amahan.
Ang biktima gikan pa sa iyang trabaho sa Copper Corporation sa lungsod sa Carmen ug matag semana lang mopauli sa ilang pinuy-anan.
Sa tantong panaglalis nahutdan sa katarungan ang bana ug gikuha ang armas niini sa ilang lawak ug dayon miadto sa comfort room ug didto gipabuto kini punting sa iyang ulo nga maoy hinungdan sa hinanali niyang kamatayon.
Sa pagkakaron gisuta pa sa kapolisan kun unsay giawayan sa magtiayon ug nganong naghikog si Gesite.