Kagawad nanghasi

Kagawad sa barangay Lagtang gireklamo sa mga silingan nga nanghasi niadtong Sabado apan ang mga biktima mipa-blotter sa hitabo diha sa police station sa barangay Poblacion.

Ang suspetsado mao si Wilson Alferez, 40-anyos, konsehal sa maong barangay kinsa gireklamo sa iyang mga silingang sila si Nick Madaya, 58 ug Rosario Cabradilla,       63.

Base sa imbestigasyon sa kapolisan gikatahong masuk-anong nangita si Alferez kang Madaya ug nag-singgit-singgit pa kini, apan dihang giduol kini ni Madaya gikatahong mihana og hamag ang konsehal apan napugngan kini sa iyang asawa ug mga paryente.

Dugang pa niini laing silingan ni Alferez nga si Cabradilla mipasangil sa konsehal nga nagsinggit-singgit usab sa ilang tugkaran.

Si Cabradilla kinsa diha sulod sa iyang balay niadtong higayona ang wala magtagad sa suspetsado.

Si Alferez sa iyang bahin, sa pakighinabi niini sa Banat News kagahapon sa hapon ang mihimakak sa mga pasangil batok kaniya.

Gibutyag ni Alferez nga ang maong bangi nagsugod dihang ang karsada nga paingon ngadto sa ilang gipuy-an sa ibabaw’ng bahin ang ilang gipa-rip-rap tungod kay ang yuta niini modahili ug motabon diha sa ilang agianan.

Matud niini nga ang pamilya Cabradilla ang usa sa mga tag-iya sa maong yuta nga gihimo karong karsada ug wala siya’y kalibutan kung nadonar ba kini.

Si Alferez mipasangil nga kasab-an ug mandoan nga ipahunong ang trabaho sa nahisgutan niyang mga silingan ang mga tawo nga ilang gisuholan nga mibuhat og rip-rap ug ang maong mga tawo ang mosumbong usab ngadto kanila.