Usa ka panimalay sa usa ka negosyante og fashion boutique ang hingpit nga naugdaw sa sunog diha sa Casals Village sa barangay Mabolo niadtong milabay'ng Biyernes sa gabii ug laing usa ang nadanyos.
Ang alarma nadawat sa kabomberuhan alas 7:21 sa gabii ug nikabat lang og lima ka minutos una kini nakontrolar sa mga mirespondeng bombero.
Ang panimalay gipanag-iya sa usa ka Alfred Chua kansang pamilya wala diha pagkahitabo gawas sa wala pa mailhing katabang nga hangtud karon gipangita pa sa mga imbestigador sa Bureau of Fire Protection.
Sa imbestigasyon ni SFO2 Felix Romero dunay nakakitang mga silingan nga nidagan nga naghilak ang katabang nga babaye sa mga Chua pagawas sa panimalay ug hangtud karon wala pa nila igkita.
Wala pa matino kung unsay sinugdanan sa maong sunog apan gibana-banang mokabat sa P350,000 ang danyos niini.
Samtang ang tupad nga balay nga gipanag-iya ni Tony Dy nakasinati usab og kadaut gumikan sa kainit sa kalayo, walay nareport nga dunay nasamdan o namatay sa maong insidente.
Gikatakdang ipatawag sa kabomberuhan ang katabang sa mga Chua aron paghatag og katin-awan sa nahitabo.