Ahente sa PDEA ug PNP Siquijor pasidunggan

Hatagan og pasidungog sa Committee on Drugs sa Ubos Balay Balauranan ang mga sakop sa Philippine Drug Enforcement Agency (PDEA-7), Regional Anti-Illegal Drug Task Force ingon man ang mga sakop sa Provincial Police Office sa Siquijor human sa ilang malampusong pagsikop nila ni Atty. Rex Perewperew ug sa pamilya niini nga nalambigit sa pagpamaligya sa ginadiling drugas niadtong miaging adlaw  didto sa barangay Ulo, Siquijor.

Si Atty. Clarence Paul Oaminal, ang consultant sa PDEA-7 nga gikahinabi sa Banat News nagkanayon nga giandam  na karon nila ang pasidungog nga medal of merit sa maong mga ahente sa PDEA-7 ug sa ubang mga unit nga niabag sa malampusong  operasyon.

Matud pa niini nga ang Committee on Dangerous  Drug sa Ubos Balay balauranan ug ang tsirman niining si  Kongresista Roque Ablan sa Ilocos Norte ingon man sa Vice Chairman nga si Kongresista Antonio Cuenco maoy modunol sa maong pasidungog.

Sumala pa niini nga "approved in principles" na ang maong pasidungog nga pagatambongan mismo sa tsirman sa Committee on Drugs  ug gani posible karong petsa 26 ning buwana gumikan kay  sesyon pa  ang mga kongresista sa kaulohan.

Dugang niini nga anaa na unya sa  Korte Suprema sa paglantaw sa kasong disbarment batok kang Atty. Perewperew samtang gi-pressumed pa kini karon nga inosente labot sa maong pamasangil.

Ang Awit-Kina-iyang Sugbu-anon

Gibanhaw ni President Dodong Gullas ang Katahom

Ni PACING FLORES

Pagkatahom ug Pagka-anindot gayong sud-ongon,

Ning ato karong pamayhon,

Hupong gayod sa mga matam-is nga pahiyom,

Daw sa wa'y mga dag-om,

Kaninyo mahal namong organizer,

President Dodong Gullas ug kapikas Nina, ang inspirer,

Ning pundok sa mga mag-aawit nga kinasingkasing magpa-ambit,

Daw hulog nga grasya gikan sa langit!

Sa awit ma-ipadagayday mo,

Mga pagbati sa atong isigkatawo,

Makalipay man siya o kasubo,

Ang awit sa galamhan gayod sa tawo mopahimangno!

Ang awit maoy usa ka langitnong pamaagi,

Nga mailarawan ang atong mga pagbati,

Makalipay man siya o kasub-anan,

Sa awit gayod kita mahupayan!

Mga karaang awit kanhi-ay,

Sa kasingkasing ug kalag gayod makalipay,

Mga pinolungan nga dulot sa galamhan,

Bulahan ka, President Dodong Gullas ug mga kauban

Nga maghatag og bili sa mga awit nga kara-an,

Kay gipukaw mo ang mga hiyas nga sumbanan

Niadtong mga sulondon tang mga katigulangan!

Usbon ko, kaninyo President Dodong Gullas ug mga kaubanan,

Kanunay unta ang lamdag sa kahitas-an,

Mogiya sa inyong mga kalihukan,

Nga unta sa kanunay kamo giyahan sa Holy Spirit uban ni Ma. Santisima ug

Sa Diyos Amahan, Salamat!