Lima ka kapitan sa Talisay mideklarar karera free
Si Supt. Romeo Perigo, hepe sa kapolisan sa dakbayan, mibutyag kagahapon sa Banat News nga si Kapitan Dario Villaver sa Barangay Mohon, Arnold dela Torre sa Cansojong, Deliah Ybañez sa Lawaan III, Reynaldo Sedentario sa Linao ug Marlouie Dagohoy sa Biasong ang mideklara nga “karera free” ang ilang mga barangay.
Apan matud sa hepe nga bisan og mideklara ang maong mga kapitan nga wala nay karera ang ilang mga barangay sige gihapon nila kining bisitahon.
Kahinumduman nga niadtong buwan sa Disyembre sa milabay'ng tuig ang kapolisan ug mga opisyal sa dakbayan misunog sa 30 ka video karera ug duha ka moli-moli.
Human sa maong pagsunog ang kapolisan padayon gihapon sa ilang operasyon batok sa mga de makinang pasugalan diin gikan sa buwan sa Disyembre sa milabay'ng tuig hangtod niining buwana sobra na sa 20 ka makinang pasugalan ang ilang nasakmit gikan sa mga nagkalain-laing barangay sa siyudad apan wala pa motataw ang hepe kun kanus-a nila sunogon ang bag-o nilang mga nakonpiskar nga de makinang pasugalan.
Gibutyag sa hepe nga tungod sa pag-ayuda sa opisyal sa mga barangay sa dakbayan mihinay na ang operasyon sa karera sa Talisay.
Kahinumduman nga ang kasagarang mopusta og karera ang mga bata ug uban kanila ang nalambigit sa pagpangawat.
Si Perigo midungag nga ang mga ginikanan kinsa ang mga anak nalambigit sa pagpamusta sa karera mosumbong dayon ngadto sa opisyal sa ilang mga barangay aron mahatag og aksiyon nga maoy hinungdan sa pagkahinay sa operasyon sa maong ilegal nga sugal. (Brenda D. Batuto)
- Latest
- Trending
