Ang manager sa Cebu Ports Authority (CPA) Angelo Verdan mibahad nga iyang isumbong sa piniyalan ni Presidente Gloria Macapagal Arroyo ang pagsalikway sa taga Santander sa plano nga magtukod ang CPA og pantalan didto sa maong lungsod.
Ang maong bahad gipalanog ni Verdan human siya makigtagbo sa mga kadagkuan sa lungsod sa Santander didto sa opisina ni Gobernador Gwen Garcia niadtong Lunes.
Sa maong panagtagbo gipadayag sa mga opisyal sa lokal nga kagamhanan sa Santander ang ilang sentimento nga matud pa apiktahan ang ilang kinitaan kun madugangan pa og pantalan ang ilang lungsod.
Kini tungod kay ang duha ka mga pantalan nga gipadagan sa mga negosyanteng pribado diha sa barangay Liloan ug Talisay nga pulos sakop sa Santander may kalagmitang mominus usab ang kinitaan niini.
Si Verdan kinsa nakasabot usab nga gipaboran sa gobernador ang hunahuna sa taga Santander nagkanayon nga iya kining isumbong ngadto kang Presidential Management Staff director general Cerge Remonde, ang hepe sa Infrastructure Monitoring Task Force.
Matud pa ni Verdan nga si Remonde maoy unang miawhag kaniya nga patarokan og pantalan ang Santander nga para sa roll -on roll -off ( RORO) nga pasaheroan sa dagat.
Ang giplanohan ni Verdan mao ang tumoy nga bahin sa Santander nga adto niya tukora didto ang roro port aron mosilbe sa mga pasahero alang sa Camiguin ug Siquijor.
Miingon si Verdan nga kun way roro port ang Santander, way kadunggoan ang barkong roro gikan sa Dumaguete paingon sa habagatang bahin sa Cebu.
Ang roll-on-roll off nga mga sakyanan sa dagat maoy kabahin sa programa ni Presidente Gloria Macapagal Arroyo sa tinguha nga kasilbihan pag-ayo ang panginahanglan sa katawhan sa transportasyon sa kadagatan sa tibook nasud.
Ang provincial board misang-at usab og resolusyon nga naghangyo kang Presidente Arroyo nga mandaran ang CPA sa paghunong sa plano niini pagtukod og pantalan sa Santander.
Apan si Verdan miingon nga paabuton usab niya ang hukom sa Presidente niini pinaagi sa iyang piniyalan nga si Remonde. (Wen Celen)