P1.50 usbaw sa pletihan tukion

Tukion karung adlawa sa ulohang buhatan sa Land Transportation Franchising and Regularoty Board LTFRB-7) ang petisyon alang sa dugang P1.50 nga usbaw sa pletihan sa mga pampublikong sakyanan dinhi sa Central Visayas.

Gibutyag ni Reynaldo Elnar ang Acting Regional Director sa LTFRB-7 atol sa interview sa DyDD nga mao kini iyang nasayran gikan kang Maria Ellen Cabatu board of director sa LTFRB-Manila atol sa iyang pagtambong og komperensya sa nilabay'ng semana didto sa ilang ulohang buhatan.

Matud ni Elnar  giduso niya ang tanang petisyon sa Citrasco, Vudtrasco  ug uban pang transport group dinhi sa Sugbo nga nangayo og dugang  umento sa plitihan.

Matud ni Elnar gipahibalo siya ni Cabatu nga tukion ug gipatawag nila nga hearing karung adlawa ang tanang petisyon alang sa usbaw sa suholan lakip na ang giduso nga petisyon alang sa usbaw sa pletihan didto sa Metro Manila.

Gitug-an ni Elnar ang makab-ot nga desisyon sa maong hearing kun dunay aprobahan nga umento sa pletihan ang posibling i-consolidate lang ang petisyon dinhi sa Sugbu sa daghan usab nga petisyon gikan sa sektor sa transportasyon didto sa kaulohan.

Nasayran nga niadto pang milabay'ng tuig giduso sa transport group dinhi sa Sugbu ang gidemanda nila nga dugang P1.50 nga usbaw gikan sa P6.00 nga minimum nga pletihan matag 1st five kilometer  ug dugang P1.50 alang sa succeeding kilometers.

Gibasihan sa transport group sa Sugbu  pagduso ning maong petisyon ang padayong pagsaka sa presyo sa produktong petrolyo nga naka-apektar usab sa ilang adlaw adlaw nga kinitaan gikan sa pagpamasahero.